O Mecalia Atlético Guardés da Liga Guereras xa ten á súa primeira incorporación: a extremo dereito Daniela Moreno Lahora. A xogadora internacional de 19 anos chega procedente do Balonmán Alcobendas, club no cal pasou por todas as categorías desde hai 12 anos.
Moreno desexa “lograr todos os obxectivos do equipo” e continuar coa súa progresión no combinado nacional. Na Guarda, dedicarase cento por cento ao balonmán pero a súa intención é seguir formándose en idiomas e outras actividades. Moreno, filla de Laura Lahora, xogadora internacional arxentina e actualmente adestradora en Alcobendas, é a principal “culpable” de que a súa filla tamén elixise este deporte.
Para coñecer mellor a proxección da xa nova xogadora guardesa basta repasar algún dos seus méritos deportivos: campioa coa selección nacional promesas no Torneo de Polonia (2015), bronce con Madrid no CESA (2016), MVP da Minicopa da Raíña 2016 onde se proclamou campioa co equipo cadete do Alcobendas, elixida no 7 ideal do Torneo Scandibérico xuvenil (2017), campioa de España con Madrid (2018), ‘Guerreira Iberdrola’ da J.17 da liga 2018/2019 e sétimo posto europeo co combinado júnior.
Desde Madrid, Daniela Moreno contou ao seu novo club como se forxou a súa incorporación ao equipo de José Ignacio Prades e os seus retos.
Pregunta: Que che convenceu do proxecto do Guardés para a tempada 2020/2021?
Resposta: Convenceume a seriedade histórica do club e que sempre está a pelexar por cousas importantes, compite en Europa e, por suposto, a tranquilidade e a proximidade que me transmitiu José Ignacio Prades cando falei con el sobre o proxecto deportivo foi fundamental.
P: Vesche preparada para un nivel de traballo e esixencia maior nun equipo con distintos obxectivos do que procedes?
R: Si, estou con moitas ganas de aprender e seguir progresando. E espero responder positivamente as expectativas.
P: Un reto persoal para a próxima tempada?
R: Lograr todos os obxectivos do equipo e ter a oportunidade de disputar o Mundial júnior en decembro que sería a mellor forma de pechar a miña etapa en categorías inferiores coas ‘Guerreiras’.
Daniela Moreno, xogadora do Atlético Guardés: “Gustariame lograr todos os obxectivos do equipo e ter a oportunidade de disputar o Mundial júnior en decembro”.
P: Que referencias tes do persoal? Das túas novas compañeiras?
R: Encántame seguir a liga, sei que o equipo ten un plantel moi forte á que se renovou practicamente na súa totalidade e iso é a mellor referencia do equipo.
P: Chegas para substituír a Sara Bravo e compartirás posto coa internacional arxentina Rosario Urban. Coñécela?
R: Persoalmente non coñezo a Rosario pero teño que destacar que os meus pais son arxentinos e sigo moito o balonmán arxentino, xa que a miña nai foi internacional arxentina.
Daniela Moreno, xogadora do Atlético Guardés: “Persoalmente non coñezo a Rosario pero teño que destacar que os meus pais son arxentinos e sigo moito o balonmán arxentino, xa que a miña nai foi internacional arxentina”.
“Xogadora con futuro moi prometedor”
O adestrador do Guardés, José I. Prades, presenta a Daniela Moreno como unha xogadora “cun futuro super prometedor” que “se atopa na órbita da selección nacional júnior”. Prades destaca a súa “calidade na definición” pero ve ao extremo dereito como unha xogadora “moi completa, que está a se formar e que ten moitísimas calidades. Esperemos que connosco poida continuar coa súa progresión dos últimos anos, que axude ao equipo, que alcancemos os nosos obxectivos xuntas”, desexa o técnico.
“Creo que se complementará moi ben coa súa compañeira de posto: Rosario Urban”, gabia.
José Prades, adestrador do Guardés: “É unha xogadora moi completa. Esperemos que connosco poida continuar coa súa progresión dos últimos anos, que axude ao equipo, que alcancemos os nosos obxectivos xuntas”.
Con esta fichaxe a plantilla do Mecalia Atl. Guardés componse xa de catorce xogadoras: Carratú, Sempere, Pérez, Buforn, Descalzo, Gómez, Valero, Urban, Mazza, Morais, Barbosa, Lima, Santiago e Moreno.
