O equipo feminino do CW Pontevedra, formado por xogadoras pontevedresas e do CW Pavillón Ourense, entrou na historia do waterpolo galego e estatal, logrando o ascenso a Primeira División Nacional Feminina. Trátase dun ascenso histórico, xa que por primeira vez un equipo galego logra ascender a categoría nacional feminina.
Tras conseguir unha contundente vitoria no partido de ida da Fase de Ascenso a Primeira División Nacional Feminina, celebrado o 7 de maio na piscina da Escola Naval Militar de Marín (20-2), o equipo pontevedrés-ourensán viaxou a Murcia coa tranquilidade de levar 18 goles de vantaxe.
Tras unha longa viaxe en autobús o venres 13 (saíndo ás 8:00 de Pontevedra e chegando ás 22:00 h a Murcia), o sábado pola mañá o equipo aproveitou para facer un pouco de turismo pola cidade de Murcia, acompañado de familiares e amigos que non quixeron perderse esta viaxe para facer historia.
Ás 16:30 h do sábado 14 de maio comezaba o decisivo partido de volta na piscina de Inacua (Murcia) entre CW Murcia e CW Pontevedra. As visitantes saíron con gran intensidade como no partido de ida, pero con máis confianza e tranquilidade, logrando un primeiro parcial de 1-7.
A partir de aquí todo o equipo foi rotando para que todas puidesen gozar do partido e da experiencia, pero desexando que chegase o final para poder certificar o ansiado ascenso. Tras os 32 minutos de xogo efectivo, o equipo arbitral pitou o final cun marcador favorable ao CW Pontevedra por 4-17.
O Club Waterpolo Pontevedra entra así na Primeira Nacional Feminina de Waterpolo. Histórico!
Un traballo conxunto do CW Pontevedra e o CW Pavillón Ourense
Desde o club salientan o éxito que este fito supón para o waterpolo pontevedrés, ourensán e galego, “froito do gran traballo e esforzo que as 21 mozas que compoñen o equipo fixeron ao longo de toda a tempada”, explican fontes do club.
No Club Waterpolo Pontevedra dedican o ascenso do seu equipo feminino “a todas as persoas que formaron parte do Club Waterpolo Pontevedra e do Club Waterpolo Pavillón Ourense nos case 25 anos de historia de ambos os clubs, nos que moita xente puxo o seu gran de area e sementou as sementes para lograr este gran salto a categoría nacional. O noso agradecemento a quen viaxou co equipo para mostrarlles o seu apoio, e a institucións e empresas que colaboraron para facer posible este obxectivo”.
Despois dunha eliminatoria para que un dos dous equipos lograse o ascenso a Primeira Nacional, houbo foto de grupo para a historia entre CW Pontevedra e Club Waterpolo Murcia. A rivalidade entre ambos os dous equipos quedou na auga e a deportividade estivo por encima de todo.
FICHA TÉCNICA:
4) CW MURCIA: Claudia Kleer, Beira B, Olaya Guillamon, Julia Martínez, Candela Cano, Lucía Monreal (1), Elsa Marhuenda, Sara Pérez (1), Claudia Soler, María Montesinos, Lourdes Conesa (1) e Encarna Muñoz (1).
17) CW PONTEVEDRA: Patri Blanco, Uxía Ferreira (1), María Domínguez (1), María do Olmo, Iria Amoedo, Noa T, María Seara (1), Izaskun Tellería (5), Andrea Fernández, Sabela Guevara, Irene Esteban (5), Andrea Andion (4) e Ali Silva.
PARCIAIS: 1-7, 1-2, 0-7 e 2-1.
EQUIPO ARBITRAL: Carlos Rodilla Álvarez, Daninel Román Macía, Enrique Benedi Tarin.
INCIDENCIAS: Partido disputado no Centro Deportivo Inacua en Murcia.
Consulta aquí a ficha completa do partido.
