O equipo do CW Pontevedra, con xogadoras do CW Pabellón de Ourense, disputou en Paços de Ferreira o Torneio Luso-Galaico de Waterpolo, organizado pola Asociaçao de Nataçao do Norte de Portugal e a Federación Galega de Natación. As galegas quedaron terceiras.
Esta foi unha gran oportunidade para o conxunto pontevedrés, no que as xogadoras puideron desfrutar dunha fin de semana de convivencia para que o equipo se coñeza e se una tras as incorporacións das deportistas ourensás.
Ademais de facer grupo, o equipo practicou pensando xa no inicio da Liga Galega, que dará comezo o sábado 23 de outubro.
Torneio Luso-Galaico de Waterpolo
O torneo galego portugués disputouse cun formato de liga, con catro equipos participantes, un galego e catro lusos. Deu comezo o sábado, cun partido do CW Pontevedra ante o Clube Fluvial Portuense, actual subcampión da Liga Feminina A1 de Portugal.
O equipo portugués demostrou na auga a súa superioridade, vencendo por un contundente 23-5. Porén, as galegas aguantaron no primeiro cuarto, plantando cara ás locais, cun primeiro parcial 5-3. Non foi ata mediados do segundo cuarto cando o Fluvial comezou a distanciarse.
O segundo encontro do sábado foi máis doado para as pontevedresas, que se enfrontaban ao Lousada Século XXI, recentemente ascendido á máxima categoría portuguesa e que conta cun plantel máis xoven e reducido. Neste duelo, o CW Pontevedra dominou o partido nos primeiros minutos e conseguiu a vitoria por un 7-17 final.
Na xornada de domingo, as galegas xogaron contra o club organizador, o Clube Acuático Pacense, subcampión da Taça Feminina de Portugal e reforzado con novas fichaxes. Este ano disputará a Euroliga de Waterpolo.
As pacenses foron superiores ás galegas desde o inicio, cun xogo moi duro e intenso durante todo o encontro. Malia isto, as pontevedresas loitaron en todo momento e a pesar da derrota lograron acumular boa experiencia para futuros partidos. O duelo rematou nun 7-17.
O último partido enfrontou de novo ao CW Pontevedra contra o Lousada pola terceira posición. Neste encontro, as galegas aproveitaron para facer probas e adestrar algunhas xogadas. A primeira parte do duelo estivo igualado, pero as lusas adiantáronse chegando a ter unha vantaxe de catro goles. Desde o terceiro cuarto, as pontevedresas aumentaron o ritmo na defensa e a base de contraataques lograron aremontada, vencendo finalmente por un 17-11.
View this post on Instagram
As xogadoras do CW Pontevedra
En liñas xerais, este campionato foi unha gran experiencia para o conxunto galego, que tivo a oportunidade de prepararse para o novo curso. Desde o club agradecen ao ANNP a oportunidade de participar na competición, e a organización do mesmo. O gañador desta fase foi o Clube Fluvial Portuense, que gañou ao CAP por un 18-8.
Neste Torneio Luso-Galaico xogaron:
- Patri
- Uxía
- María Domínguez
- Marí do Olmo
- Iria Amoedo
- Noa
- María Seara
- Izaskun
- Iria Guevara
- Sabela
- Irene
- Andrea Andión
- Alicia
- Ángela
