O equipo de Superliga Femenina 2 do Club Instituto Zalaeta da Coruña, o Autos Cancela CV Zalaeta, enfrontarase este sábado, 10 de decembro, ás 19:00 horas contra o RGCC Covadonga. Lonxe de ser un partido ao uso, o obxectivo será reivindicar a loita contra a violencia de xénero (o pasado 25 de novembro celebrouse o Día Internacional da Eliminación da Violencia contra a Muller).
Desde a directiva do Autos Cancela CV Zalaeta transmiten que “esta loita é de todos os días”. O partido ante o RGCC Covadonga será no pavillón do Barrio das Flores e a iniciativa ten especial relevancia neste club cunha masa social de preto de 200 mulleres repartidas nas distintas categorías deportivas. “Necesitamos que as nenas reforcen a súa postura e a súa identidade e perdan o medo, que se sintan seguras de si mesmas”, explicou a vicepresidenta do club, Estrella Pérez, que tamén asegurou que nos últimos anos ve con asombro o aumento das agresións machistas e o control dos adolescentes sobre as súas parellas.
A colocadora do equipo, Cecilia Thon, puxo de relevancia o feito de que sexan un equipo feminino e uniuse a que “esta loita contra a violencia teña lugar cada día e non so datas sinaladas”.
CV Zalaeta e RGCC Covadonga, contra a violencia de xénero
Pola súa banda, o presidente do Autos Cancela CV Zalaeta, Nicolau Santos, detallou que ao comezo do encontro ambos os conxuntos e parte das xogadoras de categorías inferiores do club coruñés lucirán pancartas coa mensaxe “Non á violencia de xénero” en grandes letras moradas.
Sobre a violencia machista, Nicolau Santos afirmou que “é un problema moi grave na sociedade no que nos significamos como equipo feminino”, ao mesmo tempo que fixo un chamamento a traballar para “evitar abusos e a censura da liberdade das mulleres”.
Está prevista a asistencia ao encontro do director xerente dá Fundación Deporte Galego, Iván Clavel San Emeterio e a conselleira de Emprego e Igualdade da Xunta de Galicia, María Jesús Lorenzana.
