O CV Zalaeta mantén a categoría na Superliga Feminina 2 de voleibol cando aínda queda unha xornada por disputar. As xogadoras que adestra Jorge Barrero deron renda solta á súa ledicia ao anotar o punto de set e de partido que lles outorgaba a permanencia.
Custou ás coruñesas facerse con esta vitoria na que loitaron até os cinco sets para acadar o trunfo diante do Extremadura Arroyo. Non era para menos xa que as visitantes son as segundas clasificadas deste grupo, unicamente superadas polo VP Madrid, líder.
O primeiro set caeu do lado local cun 25-22 que permitía ás coruñesas pensar en que non sería doado pero podían plantarlle cara a un rival da altural do Extremadura Arroyo. Pero no segundo, as extremeñas pasáronlles por riba ás galegas cun rotundo e incontestable 15-25.
As xogadoras que adestra Jorge Barrero non querían deixar pasar a ocasión de certificar a súa permanencia diante da súa afición así que plantáronlle cara as visitantes nun terceiro set que, aínda que caeu do lado extremeño, deixou claro que o CV Zalaeta non é un rival feble. Chegouse ao 28-30.
O cuarto set tampouco foi doado pero quedou na casa cun axustado pero suficiente marcador de 25-23. No electrónico do pavillón do Barrio das Flores lucía un 2-2 e galegas e extremeñas afrontaron o último set á procura da vitoria final. O premio foi para as locais do Autos Cancela CV Zalaeta que se impuxeron no quinto set por 16-14 colocando no luminoso un 3-2 para as locais.
A clasificación sitúa ás galegas, logo desta penúltima xornada, no sexto lugar con 25 puntos e asegura ás pupilas de Jorge Barrero o seu concurso o vindeiro ano na Superliga Feminina 2, é dicir, a categoría de prata do voleibol feminino español.
Próxima xornada do CV Zalaeta, en Sestao
Na última xornada desta fase regular o Autos Cancela CV Zalaeta viaxa a medirse co CV Sestao (cuartas clasificadas na táboa) no pavillón polideportivo de La Benedicta. A xornada vaise disputar en horario unificado, polo que todos os partidos se xogan o sábado 27 de marzo ás 18:00 horas.
FICHA TÉCNICA
3) AUTOS CANCELA CV ZALAETA: Patricia Santos, Alba Quirós, Eleonora Guzzi, Laura Vázquez, Carla Figueroa, María Forteza – sexteto inicial -. Tamén xogaron: Claudia Gómez, Cris Bermejo, Andrea Rivas, Susana Suárez e Noemí Sánchez (Líbero)
2) EXTREMADURA ARROYO: Belén Arends, Ana Lucas, Isabel Espino, María Larrakoetxea, Flavia Dias de Lima, Janine Sandell – sexteto inicial -. Tamén xogaron: María Carrero, Bea Gómez (Líbero), Mariangeles Moreno e Nerea Jiménez.
PARCIAIS: 25-22, 15-25, 28-30, 25-23 e 16-14.
ÁRBITROS: Francisco Barrallo Busto e José Domínguez Hernández. Anotador: Sergio Cordeiro Prado.
INCIDENCIAS: Partido correspondente á penúltima xornada 21ª da Superliga Feminina 2 da RFEVB, disputado no pavillón polideportivo do Barrio das Flores da Coruña con aforo reducido debido ás restricións pola pandemia de COVID-19.
