- O CV Arenal Emevé cheo de fouteza remonta e logra a primeira vitoria da tempada
- As loitadoras lucenses dérolle a volta ao partido (3-2: 22-25, 25-23, 21-25, 25-23, 15-10) impulsadas por unha excelsa Amelia Porteiro.
Hai noites nas que un se gaña con suor poder celebrar e desde logo as Loitadoras fixeron méritos máis que suficientes para poder gozar do San Froilán despois do partido.
O equipo que adestra Alberto Chaparro apuntáronse a súa primeira vitoria da tempada despois dunha remontada baseada na coraxe e na que Amelia Porteiro, e Ter Brugge xustificaron a súa condición de fichaxes estrela das lucenses para esta campaña. Coas incógnitas do principio de tempada e como un melón por abrir, así empezou o primeiro set no Municipal.
O certo é que tanto o CV Arenal Emevé como o CV Melilla arrincaron cun índice de acerto moi elevado e xogando a un nivel impropio desta altura da tempada. A alternancia entre ambos os equipos mantívose ata o 7-7, momento no que as norteafricanas subiron un punto máis en defensa e puxéronse por diante. Esa solidez na retagarda e o acerto na recepción foron os factores craves para que o CV Melilla dominase todo o que resto de set.
Con 17-24 e o set case decidido, só un golpe de orgullo das locais cun parcial 5-0 pareceu darlle emoción ao asunto. Mágoa que Heloisa Lacerda devolvese ao Municipal lucense á realidade ao facer o 22-25 e que as visitantes levasen a primeira manga. Poucas veces o estado dunha xogadora pode ser un termómetro tan claro da inercia dun equipo como o foi Ter Brugge no segundo set.
A nerlandesa foi protagonista para o bo e para o malo das Loitadoras no segundo set. Cando a oposta das lucenses estivo desacertada o seu equipo notouno no marcador, perdendo corda, pero cando armou o brazo con acerto as de casa viron aumentar as súas posibilidades de empatar o choque. Foi, en definitiva, unha manga con moitas idas e vindas, unha auténtica montaña rusa, na que os sete puntos que notou Ter Brugge foron clave para que as lucenses fixesen a igualada: 25-23.
Importante, pero non definitivo, o terceiro ía dilucidar se as Loitadoras defendían por completo o seu fortín. Se o CV Melilla levaba a manga faría que as locais cedesen o seu primeiro punto da tempada en casa. Empezaron moito máis enchufadas as visitantes impulsadas por unha Stauton que foi un auténtico pesadelo todo o partido: a americana afundiu todas as bólas ao longo da tarde sen opción a réplica.
Foi un pulso intenso polo que significaba o parcial e ao acerto das melillenses respondía Amelia Porteiro: a almeriense demostrou que nos momentos difíciles nada mellor que recorrer a alguén da súa experiencia.
Pero o acerto da fichaxe estrela das Loitadoras non foi suficiente para contrarrestar a contundencia do CV Melilla desde as puntas. As norteafricanas puxeron o 1-2 ao pechar 21-25 o terceiro set.
A remontada do CV Arenal Emevé
E sen rede fóronse as xogadoras que prepara o técnico Alberto Chaparro a pelexar o cuarto parcial. Gañar para forzar o tie-break ou perder para irse sen carga. Foi unha manga disputadísima, na que cada punto custaba sangue, suor e bágoas, pero as Loitadoras puxeron toda a carne no asador para seguir con vida.
Ao bo facer de Amelia Porteiro, as lucenses sumaron o brazo tenso de Margaría, unha Ter Brugge inmensa no bloqueo e o protagonismo da nova líbero da casa, Clara Carreira, que fixo mellorar as prestacións locais en defensa. Foi duro, foi disputado, pero o CV Arenal Emevé foi capaz de levar o partido á morte súbita despois de apuntarse por 25-23 o cuarto.
No tie-break as lucenses arrincaron co impulso do que vén remontando e puxéronse pronto 3-0, pero Albero Rodríguez soubo parar o partido cun tempo morto para que o CV Melilla igualase a 3. Volveron estirar o marcador as de casa para chegar ao cambio de campos 8-5.
Nese tira e afrouxa que foi todo o partido, as norteafricanas volveron darlle a volta para poñerse 8-9 e obrigar a Alberto Chaparro a chamar ás súas á lousa.
E nese frenesí de refachos ao CV Arenal Emevé tocoulle dar o definitivo de man dunha excelsa Olalla González ao saque, que deixou ás súas a só un punto da vitoria. E ese fíxoo unha Osayande, que foi a dona e señora da rede nos últimos sets.
Victoria sufrida para unha Loitadoras que se gañaron con fartura celebrar ao grande o San Froilán.
FICHA TÉCNICA
3) CV ARENAL EMEVÉ: Yasmin Batista, Ter Brugge, María Barrasa, Milena Margaría, Amalia Portero, Tess Clark -Inicial- Marta Llamedo (Líbero), Blanca Jiménez, Irene Osayande, Anjelina Starck, Clara Carreira (Líbero), Olalla González
2) CV MELILLA: Heloisa Lacerda, Lazurenko, Lukasik, Alexandra David, Djuly Bengoechea, Alexandra David, Staunton – Inicial- Almudena Martín (Líbero), Cruzado, Nadal
PARCIAIS: 22-25 (28’), 25-23 (28’), 21-25 (28’), 25-23 (32’), 15-10 (17)
EQUIPO ARBITRAL: Héctor González – Carlos Robles
INCIDENCIAS: Partido correspondente á primeira xornada da Liga Iberdrola de voleibol. O encontro xogouse no Pavillón Municipal de Lugo ante 200 seareiras/os.
