- “Estamos convencidos de que o CV Arenal Emeve vai alcanzar unha nova dimensión nun momento tan sinalado. Imos poñer todo o noso esforzo por poder revivir o ambiente que gozamos na Copa”, sinala o director de desenvolvemento, Rubén Méndez.
- Potenciarase a experiencia nos días de partido con animación nas pausas, novos xogos de luces e música, actividades infantís, ou a adaptación dalgunhas das coreografías máis populares de Tik-Tok, entre outras.
- Establecerase o horario das 19:30 dos sábados para facilitar un incremento da asistencia.
Como cada persoa que se achega a unha data sinalada, o CV Arenal Emevé preparou unha festa ao grande para a tempada na que cumprirá os 40 anos.
A entidade lucense, que en 2023 alcanzará as catro décadas, lanzou a súa campaña de abonados baixo o lema “Arenal Emevé 4.0”. O director de desenvolvemento do club, Rubén Méndez, sinala que “estamos moi orgullosos de poder presentar esta campaña nun momento no que estamos convencidos de que o club vai alcanzar unha nova dimensión”.
List@ para vivir a experiencia Emevé4.0 ??
Na tempada do noso 40 aniversario non podes perderte todo o que estamos a preparar para tí!
Entra xa na nosa web e elixe unha das tres modalidades de abono. https://t.co/bMEjG74DKW
Vive o Volei, vive Lugo, vive o Arenal Emevé!
❤💙🏐💪 pic.twitter.com/PUeBJRjDmg— Arenal Emevé (@cvemevelugo) September 1, 2022
Os prezos dos abonos para o CV Arenal Emevé
Os abonos para a tempada 22-23, na que os Loitadores e as Loitadoras competirán na máxima categoría, estarán dispoñibles en tres modalidades: individual, que terá un custo de 40€; familiar, co que poderán acceder aos partidos todos os integrantes dunha unidade familiar desde 60€; e idade dourada, dirixido a persoas a partir de 65 anos, que gozarán de toda a tempada por 25€.
Un dos principais obxectivos da directiva do CV Arenal Emevé para este curso é mellorar a experiencia da afección no día de partido. A primeira medida para logralo será establecer as 19:30 dos sábados como o horario no que os dous equipos disputarán os seus encontros no Municipal.
A bancada será protagonista dos partidos, listxs para bailar?
A decisión busca incrementar a asistencia, ao afastar a hora de inicio dos choques da sobremesa. Esta non será a única iniciativa para mellorar o ambiente, pois desde o club búscase trasladar o espectáculo da pista á bancada. Para iso, o equipo de márketing e redes sociais da entidade estivo traballando en novos xogos de luces e música, números de animación nas pausas, actividades infantís e mesmo algunhas das coreografías máis coñecidas de Tik-Tok para que todo o mundo sexa partícipe do show.
“Este ano, co regreso de Lucía Prol e Sara Folgueria, máis a continuidade de Víctor Bouza, teremos na pista aos mellores xogadores lucenses en activo. Queremos que esa emoción que veremos na pista trasládese á bancada, gustaríanos volver vivir momentos como os da Copa”, conclúe Rubén Méndez.
O proceso de altas será idéntico ao de anos anteriores: no formulario dispoñible na web do club (cvemeve.com) ou a través de whatsapp do club.
