O Salón de Plenos do Concello de Culleredo albergou a presentación da última xornada da Copa Galicia de Ciclocrós, que se celebrará o último día do ano, o sábado 31 de decembro, no recinto de Acea de Ama.
Trátase dunha actividade na que participa por primeira vez a Peña Ciclista Monte Xalo, coorganizando da cita deportiva. Á presentación acudiron o presidente da Federación Ciclismo Galego, Juan Carlos Muñiz; o presidente da Peña Ciclista Monte Xalo, Julio Brandariz; o alcalde de Culleredo, José Ramón Rioboo e o concelleiro de Deportes cullerdense, Miguel Suárez.
Unha proba na que o Concello de Culleredo colabora desde fai, polo menos, cinco edicións, na que os deportistas consideran unha contorna moi atractiva, singular ao tratarse dun recinto pechado, non sendo habitual neste tipo de competicións, sendo a antesala do Campionato de Galicia, que se celebrará en xaneiro, así como clasificatoria para o Campionato de España.
Esta proba da Copa Galicia de Ciclocrós dispútase en todas las categorías
A proba combinará rodadura sobre campo, carreiros e taludes, que dotarán á carreira da exixencia e explosividade propias da modalidade. Os participantes das primeiras mangas tomarán a saída as 9:30 horas, e espérase o concurso duns 250 deportistas entre todalas categorías feminina e masculina.
Por categorías, celebraranse tandas de Máster 30 masculina, Máster 50 masculina, Máster 60 masculina, Máster 40 masculina, cadete masculina, Élite/sub 23 feminina, júnior feminina, cadete feminina, máster feminina, Élite/sub 23 masculina, júnior masculina e infantís.
Juan Carlos Muñiz, presidente da Federación Ciclismo Galego, fixo fincapé no “traballo que está a facer o Concello de Culleredo co desenvolvemento e promoción, neste caso, do ciclismo. Estamos a presentar esta Copa de Galicia de Ciclocrós, mítica no calendario galego, e que chegou a ser Copa de España, pechando unha tempada das máis exitosas a nivel de organización e de participación”.
Desde a Peña Ciclista Monte Xalo, o seu presidente, Julio Brandariz, achegou que “desde o plano técnico vai ser o clásico circuíto, que como se apuntou antes, chegou a ser Copa de España, aínda que haberá zonas novas que non houbo outras veces, de máxima esixencia pero seguro como de costume”, e agradeceu “as colaboracións de patrocinios privados e ás institucións, como neste caso é o Concello de Culleredo”.
Rioboo: “O complexo deportivo de Acea de Ama en Culleredo é idóneo”
Pola súa banda, o alcalde de Culleredo, José Ramón Rioboo, agradeceu tanto á Federación como ao conxunto do Monte Xalo, o “escoller o noso municipio para pechar un ano 2022 da mellor maneira posible. Cremos que o ciclismo en Galicia está de parabéns, porque ademais de ter unha directiva e un presidente moi preocupado por esta modalidade deportiva, tamén ten unha gran afección no ámbito galego”.
Recalcaba o alcalde cullerdense que “o complexo deportivo de Acea de Ama é idóneo polas súas características e desexamos á organización, ao ciclismo galego e á Peña Ciclista Monte Xalo, e que o vindeiro sábado sexa a mellor despedida posible para un gran 2022 tamén no ámbito deportivo”.
