AUTOR: Pablo Blanco
As vilas coruñesas de Culleredo e Carballo vestiranse de gala este domingo e o próximo luns para acoller a fase final das competicións de Primeira Autonómica de balonmán. O evento deportivo está organizado pola Federación Galega de Balonmán e leva o nome da Deputación da Coruña. A cita contará cos mellores equipos das competicións galegas (co permiso do Saeplast Cañiza e o Asmubal Meaño, campións das súas respectivas categorías) que loitarán por acadar unha praza para a fase de ascenso a División de Honor Prata.
Esta fase final autonómica feminina desenrolarase cun formato de Final Four (semifinal e final) e comezará o domingo 16 ás 12:00 da mañá no pavillón de Tarrío no Concello de Culleredo co partido que enfrontará ao Clube Balonmán Tui co Cies Obra Civil Balonmán Chapela, no pavillón cullerdense de Tarrío.
En Culleredo acolle o terceiro cruce entre BM Tui e BM Chapela deste curso
Tudenses e Chapeleiras xa se enfrontaran en dúas ocasións na segunda fase con resultados favorables para as segundas (23-26 e 24-19). Dous encontros onde as de Tui non tiveron a regularidade necesaria para competir o partido e que empregarán como referencia para correxir erros e disputarlle a presenza na final ás súas rivais.
Neste encontro, o Chapela intentará impoñer a súa solidez defensiva, e as súa calidade individual no fronte de ataque onde xogadoras como Sandra Piñeiro, Raquel Santos e Anthea Bugallo na primeira liña terán que conducir o xogo do seu equipo. Sumaránse á aportación goleadora de Alba Rosa para intentar acadar algo positivo ante o correúdo Balonmán Tui.
Pola súa parte, as xogadoras de Jacobo Gregores, buscarán levar o partido a un ritmo máis alto no que se sintan máis cómodas e no que poidan aproveitar as transicións rápidas de Sonia Rodríguez, a verticalidade de Andrea Iglesias ou a forza de Marta Rodríguez.
Xa pola tarde, na Final 4 Autonómica Deputación da Coruña, ás 16:00 horas será o equipo de Moaña, o Balonmán S.D. Samertolameu, o que cargará coa vitola de favorito ás costas no seu enfrontamento ante o De Pueblo Carnicería Balonmán Pabellón.
Ambos os dous conxuntos enfrontábanse na primeria fase con reparto de victorias, pero no transcurso da competición o Samertolameu tivo unha traxectoria máis regular mentres que o Pabellón de Ourense tivo que acceder a esta final 4 nas eliminatorias de repesca onde apeou ao A.D. Carballal Balonmán desta loita.
O equipo moañés caracterízase por unha defensa moi sólida e o xogo combinativo na faceta ofensiva, que xunto coas aportacións en ataque de Ainoa Fernández e Sara Acuña na primeira liña compoñen os argumentos dun equipo que parte como favorito nesta semifinal. Pola contra, un Balonmán Pabellón que non ten nada que perder e que, como está no seu ADN, presentará batalla con Ángela Oliveira e Ana Pérez como máximas responsables da faceta goleadora.
O luns, quenda para Carballo
A competición trasladarase á localidade de Carballo para os enfrontamentos do luns nos que se cruzarán os equipos que saíran derrotados nas semifináis, nun terceiro e cuarto posto axendado para as 11:00 horas da mañá.
Pola contra, a final terá lugar ás 16:30 horas e decidirá o segundo representante de Galicia nas fases estatáis e que loitará polo ascenso á Divisón de Honor Prata. Compartirá obxectivo co Saeplast Cañiza, flamante campión da liga regular e firme aspirante a acadar este ascenso despois de dúas temporadas inmaculadas.
A Final 4 masculina
Esta competición alternarase nos mesmos pavillóns coa competición masculina na que competirán o Balonmán Culleredo, o Acanor Novás Valinox B, o MC360 Poio Artai e o Balonmán Porriño.
Todos os partidos serán retransmitidos pola canle de YouTube da Federación Galega de Balonmán nun desplegue de medios á altura da cita que se aveciña. O mellor balonmán galego dase cita na provincia da Coruña esta ponte, e non hai razóns para non velo.
