Cara e cruz para o Arenal Emevé e o Autos Cancela Zalaeta na xornada 16 da Superliga 2. As lucenses acadan a súa cuarta vitoria consecutiva na competición, mentres que as herculinas venderon cara a súa derrota pero perderon na localidade tinerfeña de Arona por un 3 a 2 moi axustado.
Catro de catro para un Emevé imparable na Superliga 2
O Arenal Emevé vai a por todas nesta segunda volta. Catro de catro nos últimos partidos. Esta vez a súa vítima foi o Extremadura Arroyo. No pavillón municipal de Arroyo de la Luz, as nosas galegas impuxéronse por un contudente 0 a 3 pechando os sets cun 16 a 25, 12 a 25 e 18 a 25.
As deportistas de Lugo non esperaban o resultado de hoxe. “Viñamos coa mentalidade de sufrir nesta pista que sempre se sofre como visitante”, comentaba José Valle, o adestrador do Arenal Emevé para As Nosas, tralo remate do partido. Sobre a pintura atopáronse a un Arroyo que non deixaba de cometer erros dos cales as galegas “non estaban acostumadas”.
O Arenal Emevé tivo moito nivel en saque e forzaban a recepción do rival. As fendas aumentaban no electrónico debido a que as locais non lles saía nada. O cal aproveitou o Emevé para poder irse con moita comodidada especialmente no primeiro e segundo set (16-25 e 12-25). O terceiro mantívose igualado ata o punto oito e dez.
“A partir de ahi, puxémonos dous ou tres puntos por riba e non tivemos ningún problema. É unha vitoria moi importante fóra da casa contra un rival complexo como local e moi contento co meu plantel. Esta comodidade na pista serviunos para darlle máis minutos a todas as xogadoras“, concluía Valle.
Teremos que esperar ata o fin de semana do 21 ao 22 de febreiro —debido a Superliga Júnior— para volver a desfrutar do equipo lucense. Na súa casa, no pavillón municipal de Lugo, reciben o CV Torrelavega (22 de febreiro, ás 20.00 horas).
FICHA TÉCNICA
EXTREMADURA ARROYO: Beatriz Melendez, María Carrero, Ana Lucas, María García, Yohana Rodríguez, Beatriz Gómez, María Ángeles Moreno, Isabel Espino, Launa Silva, María Guadalupe, Isabela Cardoso, Desiree Castaño e Eva Cid.
ARENAL EMEVÉ: Paula Lorenzo, Irene Yañez, Laura Villasante, Inmaculada Lavado, Uxía López, María Rodríguez, Sara Urrea, Paula Reija, Aitana Fernández, Tea Andric, Lucía Prol, Inés Rivas, Ainara Burgo e Lidia Figueira.
SETS: 16-25/12-25/ 18-25 (0-3)
ÁRBITROS: Antonio del Toro Sánchez Matamoros.
INCIDENCIAS: Partido correspondente a xornada 16 da Superliga 2 de voleibol no que enfrontou ao Extremadura Arroyo de la Luz contra o Arenal Emevé no Pavillón Municipal Arroyo de La Luz
O Zalaeta vende cara a súa derrota diante do Arona Tenerife
As herculinas loitaron ata o final nas Illas Canarias. Na pista sureña do Arona Tenerife perderon as galegas por un tanteo de 3 sets a 2. As puntuacións do sets tamén avanzaron parellas: 20-25/ 25-22/ 25-17/ 20-25/ 15-7.
O Autos Cancela Zalaeta tivo erros pero non se rendiu. No segundo e o terceiro set baixaron un pouco a intensidade, algo que aproveitou a rival para sentenciar.
Como o Emevé, a semana que ven as coruñesas van descansar. A liga non se retomará ata o 22 de febreiro. No Barrio das Flores recibirán ao Extramadura Arroyo o sábado (22 de febreiro, ás 19.00 horas)
FICHA TÉCNICA
ARONA TENERIFE SUR: Ebi Obi Na, Elisabeth Rodríguez, Carolina da Silveira, Cristiana Obi, Federica Zompatori, Alexia Vejrup, Naike Obi, Natalia Kvasnytsia, Nuria Melián, Ayat Busrru, Marta Mateos, Andrea Hernández e Erika Kliokmaneite.
AUTOS CANCELA ZALAETA: Patricia Santos, Claudia Gómez, Emma Ordoñez, Paula Lema, Andrea Rivas, Laura Vázquez, Carla Figueroa, Alba Quirós, Susana Suárez e Noemí Sánchez.
SETS: 20-25/ 25-22/ 25-17/ 20-25/ 15-7 (3-2)
ÁRBITROS: Pablo Santiago Melián Sosa.
INCIDENCIAS: Partido correspondente a xornada 16 da Superliga 2 de voleibol no que enfrontou ao Arona Tenerife Sur contra o Autos Cancela Zalaeta no Pavillón Jesús Domínguez Grillo.
