A selección galega de karate logrou dúas medallas no Campionato de España Sénior e de Para-Karate, celebrado na localidade madrileña de Leganés a pasada fin de semana. Cristy Shedimar Tojo Velasco, do club Ávalon Kai de Santiago de Compostela, proclamouse campioa de España de Para-Karate na modalidade de discapacidade visual feminino.
Outra das nosas campionas do fin de semana foi Ruth Lorenzo Couso, do Club San Francisco Teo, quen partía coma unha das favoritas da categoría de kumite -55 kg., logrou a medalla de bronce tras impoñerse nun disputado combate á manchega Andrea García Jerez.
Ademais, varios seleccionados chegaron á disputa polo terceiro posto., aínda que se deberon conformar cun meritorio quinto lugar na clasificación final, integrado por Emma Núñez García (Karate-do Carballo), Sara Bello Íñiguez (Club Bunkai), Laura Fontenla Barinaga (Club Casino de Ares) e Iván Vázquez Rivas (ESK Narón) en Kumite Individual +84 kg.
Unha gran perda para o Karate
A competición estivo marcada polo falecemento de Carmen Barro Pita, presidenta da federación galega e vice-presidenta da federación española. Unha triste noticia que se coñeceu durante o transcurso do primeiro día de competición. Carmiña, a finada presidenta, non puido ter mellor homenaxe que estas medallas logradas por dúas das súas deportistas máis destacadas.
Subida ao podio, Cristy Shedimar Tojo Velasco, do club Ávalon Kai de Santiago de Compostela, tivo un emotivo xesto en lembranza de Carmen Barro Pita sinalando co seu dedo o ceo adicando así o seu ouro en Para-Karate á que era a súa presidenta en Galicia, Carmiña.
