O CB Arxil está a desvelar aos poucos as súas cartas de cara á vindeira tempada 2023-24. Desde o club verde comunican a renovación dunha das xogadoras que máis tempadas leva no equipo: Cristina Díaz-Pache Blas. A á pivot cumprirá desta forma a súa 13ª tempada na disciplina do CB Arxil.
Cristina Díaz-Pache Blas aterrou en Pontevedra no seu primeiro ano como xogadora sénior e desde entón converteuse nunha das pezas fundamentais da entidade ponetvedesa que, na última tempada, tívoa sobre a cancha unha media de 20,27minutos por partido nos que promedió 3 puntos e 2,5 rebotes.
Esta deportista alterna a súa profesión de fisioterapeuta co exercicio do baloncesto. Trátase dunha deportista moi intelixente en defensa e en ataque. De feito, Cristina Díaz-Pache traballa creando moitos espazos para as súas compañeiras, o que lle fai unha xogadora fundamental no xogo verde.
Con Cristina Díaz-Pache Blas o CB Arxil suma un novo efectivo confirmado no seu bloque de xogadoras de cara á tempada 2023-24.
A xogadora explicaba que renovar polo CB Arxil significaba para ela “seguir gozando deste deporte. Esta será a miña décimo terceira tempada no club”.
Consultada sobre que espera achegar ao equipo sobre a pista, Cristina Díaz-Pache declaraba: “Sempre tento achegar unha defensa forte e en ataque dar todo o que poida, adaptándome ao que faga falta”.
Como xogadora, Díaz-Pache vese como unha deportista “de equipo, esfórzome por dar o que necesita o grupo en cada momento”. De cara a esta tempada márcase obxectivos individuais e colectivos como: “Crear un bo ambiente que nos axude a entendernos mellor, gozar en pista e que isto nos leve a ser máis competitivas, pero, sobre todo, evitar lesións”.
Nas aspiracións deportivas salienta Cristina Díaz-Pache o seu desexo de que o CB Arxil poida clasificarse “para a fase de ascenso e demos ese paso adiante que nos faltou este ano”.
Pídelle a deportista á afección do CB Arxil que “siga indo apoiarnos ao pavillón cada partido,e darnos o o seu agarimo na pista que moitas veces fainos falta”.
