O Celta Zorka Recalvi de Cristina Cantero ten un posto na loita polo ascenso a LF Endesa e irá a por todas na segunda fase competitiva. Despois dunha primeira fase con algún altibaixo, pero sempre no máis alto da clasificación, as viguesas remataron na terceira posición e competirán no Grupo 1 pola promoción.
Dentro deste grupo enmárcanse o Barça CBS e o Pacisa Alcobendas, polo que a técnica considera que este é “o grupo máis difícil de todos, porque hai un primeiro, un segundo e un terceiro. É o único grupo no que pasa isto. Cos tres primeiros postos así axustados, sabendo que somos equipos potentes os tres, para min é dos grupos máis difíciles. Claro, eu tampouco son obxectiva”, declara.
Ademais, afirma que as catalás son un dos conxuntos favoritos para o ascenso, xunto co Leganés e o BAXI Ferrol, “pola traxectoria que levaron durante toda a Liga”. Pase o que pase nestas xornadas, o Celta ten cumprido o seu obxectivo, “que era meternos en fase de ascenso e estar fixas na PRO. A partir de aí obviamente temos a intención de ascender, como todos os que asistimos á fase”, asegura Cantero.
BAXI e Celta xa coñecen os seus grupos para loitar polo ascenso a LF Endesa
A valoración de Cristina Cantero do Grupo 1
Analizando a cada rival por separado, do Barça considera que é “un equipo moi potente, cunha base forte de xogadoras nacionais con moita experiencia, que coñecen a Liga 1 e 2, que xogaron fases de ascenso e que ascenderon. Creo que é un equipo moi perigoso por iso”.
Individualizando nas xogadoras, Cristina Cantero sinala a xogadoras xoves de calidade, que están na Selección Española, como Julia Rueda ou Caballero, e ás estranxeiras de calidade, como Fequiere, Rakovic e Carta. “En xeral é un plantel moi compensado, que coñece moi ben o que fai e moi ben dirixidas por Isaac Fernández, adestrador da selección absoluta axudante e con moita expereiencia. Sabemos que vai ser un partido moi difícil”, comenta a adestradora.
Cristina Cantero (sobre o partido ante o Barça): “Será un partido duro, onde tes que estar moi moi ben e se queres sacalo”
Nunha análise previa ao partido, a dirixente do Celta cree que o partido ante o Barça terá a clave nas defensas, polo tipo de xogo que prefiren os dous adestradores. “A ambos gústanos defender moi ben e dominar desde a defensa e cada un intentara impoñer o seu xogo. Será un partido duro, onde tes que estar moi moi ben e se queres sacalo”, declara.
Sobre o Alcobendas, a adestradora celeste destaca a súa veteranía, pero tamén que é un “equipo moi físico”. En liñas xerais, sinala que “as súas 13 son moi grandes e van moito ao poste baixo o que as fai un rival complicado, e ademais teñen a xente de moita experiencia. Alcobendas leva xogadas 10 ou 15 fases, unha barbaridade”.
Centrándose nas súas xogadoras, destaca a Clara Rodríguez, que ascendeu con Estudiantes e Celia Menéndez, quen xogou en Liga 1 e en Liga 2 participou en varias fases. Tamén pon o foco en Togores, “unha base de moitísima calidade, unha das mellores en Liga 2”, e en Howard, “unha xogadora determinante”.
Cristina Cantero (sobre o partido co Alcobendas): “Necesitamos controlar máis o partido e que predominen a defensas maís que os ataques”
Para este partido, Cristina Cantero considera que unha puntuación baixa beneficiará ao Celta. Segundo a técnica celeste, o rival ” ten batería en todos os postos, están moi compensadas e está claro que tes que intentar defendelo todo, todo vai ser imposible, pero tratar de que elas sufran con nós e facer partidos a poucos puntos. Necesitamos controlar máis o partido e que predominen a defensas maís que os ataques”.
O Celta segue a filosofía de partido a partido
Para facer fronte a esta dura parte da competición, a adestradora considera que “o importante é pensar nos dous rivais e de feito pensar só en Barça que é o primeiro e ao día seguinte xa teremos tempo de pensar no seguinte”.
Seguindo esta filosofía de ir partido a partido, Cantero recorda que o pase á LF Endesa só será posible se as celestes son elas mesmas. “Que quere dicir ser nós? Ser capaces de desenrolar o noso xogo, que ese punto de emocións e nervios non faga que cometamos erros descontrolados que non nos permitan defender como nos gusta, nin tomar as decisións como nos gustan. Que eses nervios non nos impidan ser o que fumos durante a Liga e que sexamos capaces de chegar con todas aos dous partidos”, resume a adestradora.
Cristina Cantero: “Que quere dicir ser nós? Ser capaces de desenrolar o noso xogo, que ese punto de emocións e nervios non faga que cometamos moitísimos erros descontrolados”
Cristina Cantero augura dous partidos complicados, pola maior experiencia das rivais, pero advirte que o control das emocións e dos nervios será fundamental. “O acerto que se poida ter na toma de decisión inflúe moito no teu estado de nervios. A ver se somos capaces de desfrutar e competir moi ben que iso nos axudará a ter mellores resultados”, declara.
Referente celeste
Esta será a súa terceira fase de ascenso e, aínda que confesa que nunca se plantexou que suporía para o Celta competir na máxima categoría, asegura que se trata de “seguir dando pasos no proxecto”.
Porén, ten claro que ser representantes do club na LF Endesa permitiría que o equipo vigués seguise sendo “un referente para as nenas, creo que xa o somos en Liga 2, e para as que nos ven desde fóra e seguir crecendo desde o traballo e desde a nosa filosofía de traballo pase o que pase. Iso é o máis importante. Sería unha alegría inmensa e satisfacción conseguir o obxectivo que o club foi poñendo”. No caso de que desta vez as celestes non logren pasar á seguinte categoría, Cantero non o consideraría un fracaso.
Cristina Cantero: “Ten que ser unha festa a nivel de todo, de convivencia, de competición, de ver ás mellores do teu grupo competir e creo que é un desfrute para todos”
Agora só queda saltar á pista e competir e, sobre todo, desfrutar do baloncesto, ou todo o que deixe a COVID-19. “Creo que vai ser moi bonita, polo menos as dúas que disputei foron moi chulas. Espero que a COVID non impida o tema de público, de poder desfrutalo como ten que ser unha fase. Ten que ser unha festa a nivel de todo, de convivencia, de competición, de ver ás mellores do teu grupo competir e creo que é un desfrute para todos”, conclúe a adestradora celeste.
