- A actual seleccionadora xuvenil, Cristina Cabeza, encabezará o novo proxecto do club miñoto.
- A preparadora madrileña, de 46 anos, dirixiu ao Gijón o últimas tres tempadas.
O Mecalia Atlético Guardés 2023-24 muda de adestradora. Cristina Cabeza será quen se coloque á fronte do banco do conxunto miñoto a próxima tempada. A técnica madrileña convértese na primeira pedra do novo proxecto. Baixo a súa batuta, o conxunto da Guarda espera seguir ilusionando aos seus afeccionados nesta nova etapa.
A chegada de Cristina Cabeza non implica a saída de Ana Seabra. Ao contrario. A adestradora portuguesa seguirá formando parte do equipo miñoto e pasa a integrarse no corpo técnico da técnica madrileña. Será unha unión de forzas que, sen dúbida, vai redundar positivamente no equipo, que está a terminar de perfilar un persoal ilusionante para acometer a tempada 2023-24.
Cristina Cabeza é a actual seleccionadora española xuvenil, cargo que seguirá desempeñando de forma paralela ao de adestradora do Mecalia Atlético Guardés. A madrileña dirixiu as tres últimas tempadas a Gijón e fixo historia na cidade asturiana ao converterse na primeira preparadora que dirixe un partido europeo na entidade. De feito, o Motive.co alcanzou os cuartos de final na Copa Europea, competición na que a escuadra miñota proclamouse subcampioa.
O club asturiano decidiu destituíla en marzo, algo que non embaza en absoluto o seu excepcional labor a beiras do Cantábrico. Antes, Cristina Cabeza dirixiu ao Alcobendas, co que logrou o ascenso a División de Honra. Cristina Cabeza iniciou a súa traxectoria nos bancos en Alemaña, no Trier. Alí exerceu como xogadora – adestradora na potente Bundesliga. Dentro do 40×20 foi unha central moi técnica e capacitada para a dirección do xogo e deixou moi bo recordo no Vicar Goya almeriense e o Elche, ademais do citado Trier alemán.
Cristina Cabeza: “As expectativas son moi grandes e ambiciosas”
A nova adestradora do Mecalia Atlético Guardés recoñece ter “moita ilusión” e “moitas ganas de empezar a traballar canto antes” co seu novo persoal, á vez que se sincera sobre os seus sentimentos. “Fichar por Guardés é unha responsabilidade e un reto moi grande. As dúas cousas”, subliña a madrileña.
“As expectativas con respecto ao club e ao equipo son moi grandes e moi ambiciosas. Creo que o Guardés vén de facer unha moi boa campaña e na próxima tentaremos, como mínimo, igualala. E se podemos superala, moito mellor”, destaca a madrileña. “Eu prometo moito traballo e, a partir de aí, espero que gocemos co equipo”, engade.
E sobre a afección, a técnica do conxunto miñoto non ten dúbidas. “É un dos buques insignia do club. É de agradecer que non só empuxan nos partidos de casa. Tamén acompañan fóra moitas veces. Fan un traballo incrible. Xa os gozamos como visitantes e esperemos que agora como locais consigamos xuntos grandes cousas e sigamos gozando a lume de biqueira”, conclúe.
