Pase o que pase nas vindeiras semanas, o Victoria CF está a facer historia. O equipo coruñés, adestrado por Cris Oreiro, logrou por primeira vez proclamarse campión da Primeira División Nacional de fútbol, o que, ademais, lles permite competir no play-off de ascenso á Reto Iberdrola. A propia preparadora asegura que o momento que están a vivir “é algo histórico. Creo que o club leva 10 anos en Nacional e nunca gañara a Liga, polo conseguinte nunca alcanzara o play-off“.
O gran traballo do conxunto é refrexo do vestiario, que conta cun grupo “moi motivado, ilusionado e con ganas de gañar”. A propia técnica destaca como, tras rematar primeiras na competición regular, na viaxe de volta de Santander despois de derrotar ao Racing Féminas, unha das futbolistas máis pequenas colleu o micrófono do autobús e afirmou: “gañar a Liga está moi ben, pero hai que ascender”.
O Victoria CF finaliza a segunda fase como líder e loitará no ‘play-off’ de ascenso
Cris Oreiro explica como os resultados son froito dun traballo continuado, polo que á volta aos adestramentos tras rematar líderes non houbo festexos: “Cando rematou a celebración e chegamos dilles os parabéns pero díxenlles que o martes non había celebración, habia traballo para o play-off“.
As cebras traballan a todo ritmo, a súa “normalidade”
O martes, cando o equipo volveu ás sesións de adestramento, as xogadoras deixáronno todo no campo, subliña con orgullo a súa adestradora. “Se perdemos é porque o Betis B fai moi ben as cousas, senón vaino ter difícil. Estamos moi enchufadas”, engade.
Cris Oreiro: “Se perdemos é porque o Betis B fai moi ben as cousas, senón vaino ter difícil. Estamos moi enchufadas”
No aspecto deportivo, o primeiro obxectivo do Victoria era rematar entre os tres primeiros equipos do grupo galego, para evitar a loita pola permanencia. “Conseguímolo, pero unha vez te ves aí, es ambicioso, e ves que as posibilidades son reais. Ao final vimos que estábamos sendo mellores que os rivais e que podiamos tratar de gañar a Liga e así foi”, recorda a preparadora. Tal e como recalca, as metas a conseguir foron mudando co paso das semanas, cun conxunto que foi quen de superar todos os obstáculos.
A nivel mental e físico, as futbolistas están como a principio de tempada polo ritmo de adestramentos. A propia Cris Oreiro e o resto de compañeiros do corpo técnico sorpréndense coa intensidade do plantel, que agora tamén inclúe a algunhas pezas do filial, e que está a traballar “con moito ritmo e moita ilusión”.
Ao mesmo tempo, isto non é ningunha novidade no Victoria. A adestradora explica como están “dándolle normalidade” á situación que están a vivir. “Ao final levamos toda a tempada con que a fin de semana era o partido máis importante e isto é un pouco o mesmo”, sinala. Para ela, a normalidade é a “palabra clave”, xa que seguen o mesmo esquema de adestramentos, con sesións de vídeo cada martes e xoves.
Cris Oreiro: “Ao final levamos toda a tempada con que a fin de semana era o partido máis importante e isto é un pouco o mesmo”
“Así era como estaban vindo os resultados e cambiar en función dos resultados positivos sabíamos que non ía beneficiar. Sabemos que estamos aquí polo traballo e imos adestrar”, resume.
Enfronte, o filial dun club de Primera Iberdrola
O método que siguen no Victoria desde principios de tempada é o de focalizar o traballo no grupo propio. Na Primera Nacional non é sempre doado coñecer ao rival, polo que as cebras prefieren centrarse en si mesmas.
O propio formato da competición, con tantos grupos repartidos pola xeografía española, fai que resulte moi difícil ascender, pero as cebras están contentas co Betis B como rival tras o sorteo.
Este é un contrincante descoñecido para as galegas. “No play off un dos hándicaps é a información que tes. Tes información porque hai algún vídeo, tivemos a oportunidade de falar con algún adestrador, pero non o coñecemos de forma directa”, explica a adestradora. Por iso, o plan das herculinas é ir “fortes co noso”.
Este duelo suporá o reencontro do Victoria con Sabrina, ex xogadora que pasou algúns dos seus anos formativos no club coruñés. Cris Oreiro coincidiu con ela no ano no que subiu ao primeiro equipo, e asegura que no equipo “estamos ilusionados de que veña outra vez e de vernos, aínda que espero que sexamos nós as que gañemos”.
O posible pase de fase pillará ao Victoria fóra da casa
A primeira rolda do play-off dipútase con partido de ida e volta e as coruñesas actuarán como locais no primeiro encontro. A cita será este domingo, 13 de xuño, ás 12:00 horas no campo da Grela.
Cris Oreiro: “A nivel emocional prefería que a volta fora en casa, porque estás cos teus, xa festexamos a Liga fóra e todo iso. Pero a nivel deportivo é mellor xogar a volta fóra, porque deportivamente os goles contan o dobre”
Desta forma, o pase decidirase lonxe da Coruña, co Victoria como visitante, un aspecto cun lado positivo e un negativo. “A nivel emocional prefería que a volta fora en casa, porque estás cos teus, xa festexamos a Liga fóra e todo iso. Pero a nivel deportivo é mellor xogar a volta fóra, porque deportivamente os goles contan o dobre. Se empatas aquí ou sacas un resultado que non queres, ao final vas alí, metes un gol e vale dobre. Entón xogamos con iso”, explica Oreiro.
