- “Levo vendo xogar o groso do equipo varios anos e sei cales son as súas virtudes e tamén os aspectos que debemos de mellorar”, explica nesta entrevista Cris Oreiro, a nova adestradora do Viajes InterRías FF.
Cris Oreiro volve ser primeira adestradora neste curso. No seu regreso colócase á fronte do banco do Viajes InterRías FF. Luis Treviño deixou de adestrar ao club logo dunha etapa de oito anos. Marchou co equipo salvado e na Segunda Federación. Este ano serán as únicas galegas nunha categoría na que o pasado curso militaban tamén o Sárdoma e o PM Friol. “Ogallá poida subir de novo outro equipo galego a 2ª RFEF”, apunta nesta conversa a adestradora coruñesa.
O Viajes InterRías FF competirá no Grupo 1 e ten fixado o inicio de competición para a fin de semana do 10 de setembro. Están inmersas na pretempada para preparar o novo curso. E nese momento de preparación, a nova adestradora, Cris Oreiro, atendeu ás preguntas das Nosas.
A.N.: A nova tempada supón o inicio dunha nova etapa no banco do Viajes InterRías FF e tamén para vostede. Feliz de volver adestrar?
CRIS OREIRO: Si, moi feliz de voltar ao banco e moi agradecida o club por confiar en min e darme a oportunidade de iniciar esta nova etapa ao fronte do equipo.
A.N.: É un reto persoal o volver a poñerse á fronte dun banco, non estar en segundo plano.
CRIS OREIRO: En segundo plano estou de novo, dende que un deixa de xogar, onde é o protagonista, nunca volve a estar en primeiro plano. Si te refires o papel de segunda adestradora respecto o de primeira, o reto para min era estar de segunda, ser a primeira adestradora é para o que me formei e me sinto capacitada.
A.N.: Chega ao Viajes InterRías con Adrián Sardiña ao seu lado no staff, é importante para o traballo técnico rodearse de persoas da súa confianza, supoño.
CRIS OREIRO: O mais importante é rodearte das persoas que teñen unha metodoloxía de traballo similar, cunha visión de fútbol complementaria onde o día a día sume. Teño sorte de poder traballar con Adrián Sardiña, non porque sexa da miña confianza, senón por como traballa, que é o que valorei a hora de querer contar con el.
A.N.: Como definiría ao bloque de xogadoras que vai dirixir este ano en termos de grupo
CRIS OREIRO: Definiríaas como ambiciosas e moi competitivas.
A.N.: Que tipo de fútbol lle gustaría que xogase o Viajes InterRías FF
CRIS OREIRO: Queremos ser protagonistas con balón, dominar os encontros a nivel ofensivo, e coa mesma, poder defendernos tamén mantendo a posesión do esférico. Ser fortes nos duelos e agresivas nos momentos sen balón.
Oreiro, adestradora do Viajes InterRías FF: “Queremos ser protagonistas con balón, dominar os encontros a nivel ofensivo, e coa mesma, poder defendernos tamén mantendo a posesión do esférico. Ser fortes nos duelos e agresivas nos momentos sen balón”
A.N.: Seguro que a estas alturas de tempada hai moito que pulir. Cóntenos virtudes e tamén cousas a mellorar no traballo diario deste grupo de futbolistas.
CRIS OREIRO: Comezar de 0 un modelo de xogo basado na fase ofensiva non é doado, polo tanto sempre imos ter cousas que pulir e mellorar. Estamos centrados en que comprendan o xogo, melloren a toma de decisión e saiban porque fan as cousas e non que as fagan porque si, e en canto a isto, estamos contentos coa implicación do grupo, que está preguntando constantemente e iso, é un claro indicativo de que queren comprender mellor o que facemos. A parte condicional da xogadora tamén é importante para nós, onde temos moita marxe de mellora.
A.N.: Anímase a describirnos 1×1 das futbolistas que prepara?
CRIS OREIRO: Se as describo 1×1 estaría todo o día falando das xogadoras. Teño a sorte de coñecelas ben, levo vendo xogar o groso do equipo varios anos e sei cales son as súas virtudes e tamén os aspectos que debemos de mellorar. Estou moi contenta coa plantilla e agora tócame ser capaz de sacar o mellor de cada unha.
A.N.: Que rivais apunta a que se teñen que ter presentes nesta categoría?
CRIS OREIRO: Pois os que veñen de descender, que son os que optarán de novo ou tratarán de optar o ascenso, e logo os filiais, que os primeiros equipos sempre tratan de xuntar o máximo as súas categorías.
A.N.: Cal considera que será o maior reto ao que se enfronta este curso o Viajes InterRías FF
CRIS OREIRO: O maior reto é manter a categoría unha tempada mais, todo o que veña a maiores será un éxito.
A.N.: Os descensos de Sárdoma e Friol colocan ao Viajes InterRías FF como o referente galego na Segunda RFEF Grupo Norte. Outorga iso máis responsabilidade ao seu posto
CRIS OREIRO: Non, non sinto mais responsabilidade por iso. Quería que se salvasen os tres equipos a tempada pasada, gustaríame mais presencia do fútbol galego nas categorías profesionais ou semi profesionais e temos que traballar todos para tratar de conseguilo. Ogallá poida subir de novo outro equipo galego a 2ª RFEF.
Cris Oreiro: “Gustaríame máis unión para conseguir cambios”
A Selección Española de Fútbol vén de proclamarse campioa do Mundo un feito que se espera que impuse o deporte en España e que permita mellorar as condicións das futbolistas e clubs. Sobre este ‘boom’ que se está a notar ao fío do bo papel de España na Copa do Mundo preguntamos tamén a Cris Oreiro. Hai que advertir que a entrevista realizouse previamente á consecución do título por España, polo que non se fai referencia a ese fito na conversa.
A.N.: A Selección Española de fútbol está a captar a atención mediática e da afección. Considera que iso vai repercutir positivamente no resto do FutFem español o pasado o Mundial será flor dun día? Cre que mellorará dalgún xeito as condicións coas que contan clubs e futbolistas neste momento?
CRIS OREIRO: Non sei o que vai a pasar, sei o que me gustaría que pasase. Gustaríame por suposto que non fose flor dun día, que os que celebran os éxitos tamén axudasen a chegar a eles, porque para a foto final sobran caras.
Tamén me gustaría que houbese máis unión para conseguir os cambios porque é fácil esperar que outros paguen as consecuencias de pedir mentras un só se lucra dos mesmos.
España é un país futbolero e espero que se note a partir deste Mundial que tamén é un país que pouco a pouco, cree na igualdade.
Oreiro, da cancha ao banco
A galega Cris Oreiro formouse no Pastoriza como futbolista. Antes de colgar as botas defendeu as elásticas do PM Friol, RC Deportivo ou Victoria CF. As lesións de xeonllo non lle permitiron continuar co seu papel como xogadora e pasou a aumir o rol como adestradora. Xogou tamén ao fútbol sala en equipos como o Viaxes Amarelle FSF.
Coas cebras do Victoria CF, xa como adestradora, acadou un campionato de Primera Nacional no ano 2021, chegando a disputar a fase de ascenso, aínda que sen acadar o premio final.
Máis tarde a agora entrenadora do Viajes InterRías FF formou parte do corpo técnico do Dépor ABANCA como segunda de Irene Ferreras.
