A futbolista Cris Martínez Gutiérrez (Astorga, León, 26 de xuño de 1993) renovou o seu contrato co Dépor ABANCA por unha tempada máis, até o 30 de xuño de 2024. Deste xeito a deportista leonesa vestirá a elástica branquiazul durante oito tempadas.
A súa traxectoria deportiva está ligada á do conxunto coruñés. A lateral maragata é, xunto a Patri López, a única sobrevivente do primeiro cadro da historia do Dépor ABANCA, no curso 2016-2017. Así pois, Cris Martínez cumprirá a próxima campaña a súa oitava defendendo a zamarra branquiazul, unha máis, con todo, que a melidense, que na temporada 2017-2018 xogou cedida no PM Friol.
Cris Martínez, a deportivista con máis partidos oficiais
Neste momento, Cris Martínez é a xogadora que máis partidos oficiais disputou nas sete temporadas de existencia do Dépor ABANCA. A de Astorga atesora na súa conta particular 163 aparicións, moi por diante de Gaby (117), Iris (107) e Peke (106), que completan o cuarteto de futbolistas que superan o centenar de encontros.
Na presente campaña, Cristina Martínez participou nos 20 choques ligueiros, todos eles como titular e 13 completos, ademais de xogar uns minutos nun dos partidos de Copa da Raíña. Aínda que case sempre xogou como lateral dereita tamén durante este exercicio disputou encontros na banda contraria.
