- “Estou moi moi orgullosa do equipo, competimos en todos os partidos”
- “A LF Challenge é unha liga preciosa en todos os sentidos”
- “Preparar ao equipo mentalmente o mellor posible e ser capaces de competir cada partido, esa vai ser a clave da segunda volta”
Tras o remate da primeira volta na recentemente estreada LF Challenge, o Celta Zorka Recalvi, único equipo galego da competición, ocupa a décima posición, na parte inferior dunha táboa moi igualada.
A súa adestradora, Cristina Cantero, explica a As Nosas as irregularidades destes primeiros meses de competición, nunha liga “moi esixente”.
As Nosas: Despois dos primeiros meses de competición, que balance fas da primeira volta?
Cristina Cantero: En xeral a sensación que daba a liga era que se estabamos moi finas estariamos no quinto ou sexto posto, e se non, tiraríamos máis hacia baixo. Estamos na liña intermedia facendo cousas moi ben, pero escapándose partidos que non tiñan que ter escapado. Rematamos con esa idea de ser máis regulares, de intentar ser máis sólidas neses partidos, sobre todo fóra de casa, que parecía que tiñamos máis opcións que logo escapáronse. Pero estou moi moi orgullosa do equipo, competimos en todos os partidos.
Cristina Cantero: “Somos un equipo rocoso”
Somos un equipo rocoso, e estivemos sempre en partido, con posibilidades de gañalos todos. Quizais Murcia foi o equipo que máis nos superou en todo. Pero en xeral, o equipo competiu ben.
O Celta ocupa a zona media da táboa pasado o ecuador da tempada
Somos un grupo que necesita a todas ás súas xogadoras. A recuperación paulatina de Celia, a lesión de Laia que estivo varios partidos con molestias case sen poder xogar, agora a baixa de Coello con apendicite. Todas esas cousas lástrannos porque somos un equipo grupal e bastante coral no noso traballo, non temos grandes individualidades. Necesitamos moito a todo o grupo. Gustaríame ver un puntito máis. É unha liga moi esixente, os equipos rivais tamén xogan, hai planteis moi bos, moi compensados.
As Nosas: E este curso estades a estrear a nova categoría, a LF Challenge. Como a estades a vivir?
Cristina Cantero: É unha liga preciosa en todos os sentidos. Seino polo club, que é unha liga moi cara e esixente, a nivel de viaxes é un palizón, son viaxes moi caros, pero a nivel competitivo e deportivo é ideal para unha xogadora xove con proxección e con idea de medrar.
É un baloncesto profesional. Nese aspecto gañamos porque se achega a unha liga feminina, a nivel de calidade, de ritmo de xogo, de prestacións das xogadoras, de calidade delas. Aínda que a esteamos sufrindo, todos os partidos son igualados. Hai moitísimos partidos con diferenzas de nin 5 puntos. Creo que iso é boísimo para a liga. Polo que vou falando con adestradores e xogadoras, estamos todas desfrutándoa.
As Nosas: Ademais, está a ser unha competición moi igualada
Cristina Cantero: Entre derrotas e vitorias estamos nun pelotón desde a quinta ata a duodécima, no que pode estar calquera movéndose. Quedaron descolgados os dous últimos, pero non é que aos últimos todo o mundo lles gañe, todos os partidos están igualados. Ao final, se perdes tres partidos non pasa nada, porque gañas os tres seguintes e volves estar na pelexa.
Cantero: “Se perdes tres partidos non pasa nada, porque gañas os tres seguintes e volves estar na pelexa”
Hai que ter a cabeza fresca, manter a calma, saber que hai moitos partidos, isto é moi longo e tes opcións de volver. Co tema COVID xa é lotería, porque se vas xogar un partido sen pezas claves porque están con COVID, a cousa pode variar. A COVID é case coma se fora unha lesión. Nós tivemos con COVID a Celia e non xogou un partido e fóra. Isto pode cambiar para ben e para mal, pero hai que ter a cabeza fresca e saber xogar cada partido e ser o máis competitivas posibles cada sábado.
As Nosas: E co COVID, como ben dis, non se pode prever ni traballar previamente como coas lesións
Cristina Cantero: Non é só iso, o que afecta ao grupo, xera incertidume, ansiedade, o terei non o terei, a familia… Xa non é só ti, senón que intervén máis, e ese aspecto psicolóxico é moi difícil de preparar e non estamos preparados. A lesión é unha cousa coa que convivimos e é máis fácil mentalmente levar ao grupo.
Cantero: “A semana que tivemos de COVID foi durísima”
A semana que tivemos de COVID foi durísima, está a xente inquieta, adestras con máscara, agora non, agora si. Esa incertidume é moi difícil de controlar na cabeza das xogadoras. Antes afectaba moito máis, o ano pasado unha xogadora parou 2 meses, agora parece que saen máis leves, Celia está perfecta. Non sabemos como afecta, e esa incertidume mata.
As Nosas: Cambiando a un aspecto máis positivo, tedes no plantel a Davydova, MVP celeste e entre as mellores da competición
Cristina Cantero: É unha xogadora sólida en todo o que fai. É brillante. Marca o ritmo e solidez do noso equipo, a nivel de rebotes e presenza. Ese punto que ten o noso equipo para competir ben, que ten que estar ben atrás, manter esa presenza, ela nos da esa seguridade.
Grazas a deus é unha xogadora con poucas lesións, que é capaz de fisicamente aguantar moi ben todos os partidos e para nós é unha peza moi importante.
As Nosas: E para estrear o 2022, teredes unhas semanas moi ocupadas
Cristina Cantero: Empezamos este sábado e logo temos Raca, Paterna, e Cáceres seguido. Sabemos que a liga está sendo así e na primera volta fixemos non sei se tres ou catro semanas de dobres ou triples xornadas.
En xeral non se nos deu ben, as cousas como son. Por un lado estou preocupada, porque non creo que fora tema físico, tocaron bos equipos e competimos pero non o sacamos.
Cantero: “Hai que preparar ao equipo mentalmente o mellor posible e ser capaces de competir cada partido”
Preocúpame porque cando vas ás series e non gañas a ver como afrontas. Pero tampouco é o mesmo xogar en casa que fóra de casa. Agora temos Raca e Paterna en casa, e saímos a Cáceres, non é o mesmo, recuperas mellor. Estou preocupada, como con todas as xornadas, sabendo da dificultade que supón pero que o equipo o ten que afrontar o mellor posible. A liga é así.
Hai que preparar ao equipo mentalmente o mellor posible e ser capaces de competir cada partido, esa vai ser a clave da segunda volta.
