O CRAT tira partido da visita do colista, Sanse Scrum ao que vence contundentemente 73-7

Chegou por fin unha vitoria do CRAT Residencia Rialta e foi rotunda. O rival que visitaba A Coruña era o Sanse Scrum, colista. As madrileñas marcharon de Elviña como viñeron, sen triunfos no seu marcador e sostendo o faroliño vermello da Liga Iberdrola. 

Aínda que vendo o resultado do encontro (38-0 ía xa o partido ao descanso) e a clasificación xeral calquera podería levar unha sensación enganosa, a realidade é que a priori o duelo entre CRAT Residencia Rialta e Sanse Scrum disputado no campo coruñés de Elviña esperábase moi disputado.

As madrileñas, aínda que pechacancelas, viñan de dous resultados apertados diante Olímpico de Pozuelo e Eibar, este último no que foron por diante ata os compases finais e, con todo, o CRAT Residencia Rialta encadeaba varios encontros consecutivos con malas sensacións e contaba con infinidade de baixas.

Desde o asubío inicial o encontro foi dominado por completo polo equipo local, que xa nos primeiros compases logrou pasar en varias ocasións a liña de marca madrileña poñendo desde moi cedo unha diferenza grande no marcador que se iría expandindo ata o final do partido.

Boas sensacións para un CRAT Residencia Rialta que, máis aló dos cinco vitais puntos sumados, mostrou unha melloría de actitude e xogo que foron máis que evidentes a pesar de que o partido se puxese de fronte desde os primeiros compases.

O progreso mostrado, ha de marcar o camiño para seguir para os tres últimos partidos de liga regular, que resultarán claves para definir os obxectivos do equipo no que resta de curso. As galegas son terceiras pola cola con 19 puntos. Son catro de marxe co CR Sant Cugat, as súas inmediatas perseguedoras (15 puntos), pero sete menos que o conxunto que as precece o C.R. Complutense Cisneros (26 puntos). Seguinte reto: Majadahonda.