Esta fin de semana xogarán na Coruña os CRAT Sharks. O seu partido constituirá un fito histórico no deporte galego xa que será o primeiro partido de Rugby Inclusivo na modalidade XV da historia de Galicia. O escenario será a Cidade Deportiva da Torre.
O rugby inclusivo é a variedade do deporte oval adaptada para a participación de calquera persoa, independentemente da súa condición, sexo ou idade. O CRAT Coruña, tras moitos anos pelexando por conseguir formar un equipo desta modalidade, no ano 2021 fundou os Sharks, nome escollido polos propios xogadores para a sección de Rugby Inclusivo do Club.
Durante estes dous anos, os CRAT Sharks tiveron que moverse ao longo da xeografía española para disputar encontros de rugby 15, ou practicar outras modalidades como o rugby 7 ou olímpico, con todo, esta fin de semana será unha data sinalada para o deporte adaptado na cidade coruñesa, xa que por primeira vez na historia da rexión poderemos gozar dun encontro de Rugby Inclusivo XV.
O rival dos CRAT Sharks será Tuxeleires, equipo de Santiago de Compostela de recente formación e o partido celebrarase este sábado 3 de xuño ás 12:00 no Campo de Rugby da Cidade Deportiva da Torre.
