- Triunfo en Elviña do CRAT Residencia Rialta ante o Complutense Cisneros por 45 – 24
Poucos equipos hai tan sólidos cando xogan de locais como o CRAT Residencia Rialtada Coruña. Diante tiña esta xornada na máxima categoría do rugby feminino estatal ao Complutense Cisneros. Foi un partido de todo ou nada, as coruñesas volveron confirmar o seu momento. Vitoria, punto extra de bonus ofensivo e, a falta do resultado de Eibar, finalizaron o encontro no cuarto lugar, en postos de play-off.
Agora, o CRAT Residencia Rialta depende de si mesmo para entrar en semifinais. Tras este contundente e necesario triunfo, virán a Galicia Cocos e Eibar e tocará visitar o campo do Majadahonda. Se xoga como o fixo diante do Complutense Cisneros, o conxunto galego estará nas eliminatorias polo título.
Nun duelo vital para ambos os contendentes, as visitantes trataron de mandar desde o inicio. O Complutense Cisneros quixo probar a paus, sen éxito, xa no segundo minuto de partido. A resposta do CRAT Residencia Rialta foi inmediata cunha combinación entre Ceci e Elsa que non terminou en ensaio poor moi pouco.
Os dous equipos xogábanse moito: o CRAT necesitaba gañar para seguir coas súas aspiracións de entrar en play-off. Pola súa parte, o Complutense Cisneros non podía perder se quería seguir con posibilidades reais de manter a categoría. Era, polo tanto, un partido que se prevía disputado e con gran importancia para ambos os dous clubs.
Golpearon primeiro as locais. No minuto 11, Ali ensaiaba e Anita transformaba. O partido comezaba a xogarse máis no campo do CRAT e chegou a réplica no minuto 20 cun pousado e puntuación extra das madrileñas. Era un cambio de dinámica completo, Complutense Cisneros tomaba a iniciativa e o CRAT Residencia Rialta tentaba repoñerse. E logrouno, chegando de novo case a liña de ensaio. Pero, no último pase, roubou Complutense Cisneros e o pousado, tras percorrer o campo enteiro a pracer, chegou ao lado visitante. De novo, anotaba Paula Xutglà.
Tras o mazazo, as de branco e celeste tiñan pouco tempo antes do descanso para reaccionar. Ceci, cunha patada para seguir, sinalou en camiño para que Mariana, brillantemente, ensaiase e Anita igualase o marcador co pé. Tocaba ir a vestiarios e centrarse tras o intercambio de golpes.
Remontada o CRAT Residencia Rialta
Aos catro minutos, Anna Caplice rompeu polo centro e Anita sumou co pé. O CRAT Residencia Rialta consumara a remontada.
Judith ensaiou poucos minutos despois para dar tranquilidade ás coruñesas. Ademais, o equipo coruñés tería superioridade ao ver Ayuso tarxeta amarela. As galegas non souberon aproveitar esa vantaxe. Complutense Cisneros meteuse aos poucos no partido e logrou chegar a poñerse a dous puntos no tramo final. Faltaban vinte minutos e todo estaba no aire.
A parte final do encontro era das que deciden tempadas. Non houbo nervios, o CRAT Residencia Rialta impuxo o seu xogo e acabou con calquera esperanza das madrileñas. Quen ensaiou e despois Judith. Chegaba a calma. A bancada festexaba unha vitoria que sabía a gloria. Sant Cugat e Olímpico perdían os seus partidos. Ademais, Judith e Ceci tiveron tempo para seguir anotando e permitir que as galegas engadisen o punto de bonus ofensivo á marcadora.
Vitoria de cinco puntos, alegría merecida e agora si, claramente, o CRAT está en disposición, a falta de tres xornadas, de cumprir o obxectivo que se marcaba ao comezo da campaña: competir por entrar nas semifinais.
FICHA TÉCNICA
45) CRAT RESIDENCIA RIALTA: Nicky (entra Miri min. 76), Ali (entra Valle min. 78), Maica; Kyra, Pimi; Anna Caplice, Judith (entra Divi min. 33, de novo Judith min. 36), Maria Morant (entra Divi min. 60); Alba Lalín (entra Leire Gorrotxategi min. 76), Anita; Alborota (entra Tania min. 78), Quen, Ceci, Mariana e Elsa.
24) COMPLUTENSE CISNEROS: Cristina Rubio (entra Meral Acarlioglu min. 41), Elsa do Piñeiro, Lucía Malagón; Paula Gil, Sofía Ayuso; Margarita Blanco (entra Rosa Blasco min. 41), Ana Vila, Alba Alonso (entra Ester Peiroten min. 66); Elena Amo, Zahía Pérez; Pilar Rico, Inés Bueso-Inchausti (entra Luisa Zurique min. 41), Arantzazu Olabarria, Paula Xutglà e Elisa Álvarez.
ANOTACIÓNS:
- 7-0 min. 11: ensaio de Ali e transformación de Anita.
- 7-7 min. 20: ensaio de Paula Xutglà e transformación de Zahía Pérez.
- 7-14 min. 35: ensaio de Paula Xutglà e transformación de Zahía Pérez.
- 14-14 min. 38: ensaio de Mariana e transformación de Anita.
- 21-14 min. 43: ensaio de Anna Caplice e transformación de Anita.
- 26-14 min. 50: ensaio de Judith.
- 26-17 min. 63: golpe de castigo transformado por Elisa Álvarez.
- 26-24 min. 68: ensaio de Arantzazu Olabarria transormado por Zahía Pérez.
- 31-24 min. 73: ensaio de Quen.
- 38-24 min. 75: ensaio de Judith e transformación de Anita.
- 45-24 min. 80: ensaio de Ceci e transformación de Anita.
EQUIPO ARBITRAL: David Castro. Amoestou con tarxeta amarela no min. 56 á xogadora visitante Sofía Ayuso.
INCIDENCIAS: Partido correspondente á undécima xornada da Liga Iberdrola de rugby disputado no Estadio Universitario de Elviña, na Coruña.
