Complutense Cisneros recibirá ao CRAT Residencia Rialta hoxe, domingo 30 de outubro, ás 12:00 horas na cancha do Central de Madrid.
O partido corresponde á cuarta xornada da liga Iberdrola de rugby na que as coruñesas tratarán de obter o seu primeiro triunfo como visitantes tras verse sorprendidas por El Salvador no seu primeiro desprazamento do curso.
En Elviña, o CRAT Residencia Rialta venceu os seus dous partidos e, aínda que está en postos de eliminatorias polo título, necesita gañar os encontros fóra de casa para seguir arriba na táboa.
Complutense Cisneros só coñece a derrota esta campaña. El Salvador, Olímpico de Pozuelo e o líder Cocos foron os verdugos das madrileñas. Nunha competición tan igualada como se está mostrando esta División de Honra Feminina, o CRAT Residencia Rialta non debe e non pode fiarse dos resultados do Complutense Cisneros.
O trío de adestradores do conxunto galego, conformado por Pakito Usero, Jos Portos e Juan Carlos Fernández, confeccionou unha convocatoria con novidades con respecto ao último partido diante Olímpico.
A convocatoria do CRAT Residencia Rialta
Aínda que segue habendo lesións que aínda non permiten incorporarse ao grupo a algunhas xogadoras, Selene e Nicky Dix únense ao equipo recuperadas das súas doenzas. Sen dúbida, a limitación de 23 xogadoras convocadas supón un quebracabezas para os adestradores, pois o nivel do bloque do conxunto herculino é moi alto e en cada partido quedan fóra xogadoras que, doutra forma, non o farían.
Desta volta, a expedición a Madrid compóñena as seguintes xogadoras: Valle, Tere, Ronsel, Miri, Ali, Selene, Nicky, Maria Morant, Pimi, Maica, Rumi, Kyra, Alborota, Ana, Jess, Ceci, Quen, Leire Gorrotxategi, Alejandra, Alba Lalín, Judith, Maitane e Sina Hetet.
Despois desta visita a Madrid, as herculinas terán dúas duras probas. Primeiro en Sevilla, diante o invencible ata a data Cocos; e, despois, de novo na Comunidade de Madrid, contra Majadahonda, outro dos equipos chamados a loitar polo título. Partidos nos que uns bos resultados resultarán transcendentais á hora de asegurar unha praza nas eliminatorias polo campionato ao final da tempada.
