- O CRAT Residencia Rialta recibe ao Crealia El Salvador hoxe, sábado 14 de xaneiro ás 16:00 horas, no Estadio Universitario de Elviña na Coruña.
Xogan as galegas do CRAT o seu segundo partido da segunda volta, primeiro de 2023, diante un recentemente ascendido que é a revelación da tempada. O Crealia El Salvador, terceiro na táboa, avantaxa ás coruñesas en 12 puntos.
Chegados a esta novena xornada, restan seis encontros para finalizar a fase regular da Liga Iberdrola de rugby, se o CRAT Residencia Rialta quere ser un dos catro equipos que xoguen as eliminatorias polo título, debe ser forte en casa e comezar sumando unha vitoria diante o Chami, considerado o equipo revelación.
O conxunto coruñés caeu en Valladolid na primeira volta tras un choque moi disputado. Entón, o Crealia El Salvador conseguiu levar un partido de ritmo lento, o CRAT Residencia Rialta non logrou facer valer o seu xogo máis dinámico.
A lección debería estar aprendida para poder plantarlle cara ás valisoletanas, aínda que as galegas presentan unha liña de tres cuartos condicionada polas ausencias. Este partido marca o retorno de Mariana Romero, que aínda non xogara esta campaña.
O esperadísimo regreso da venezolana únese á fichaxe da irlandesa Anna Caplice, a que, en teoría vén para ser o número 8 diante a baixa para toda a tempada de Sina Hetet.
Anna Caplice terá que disputarse o posto con Maria Morant, que tan bo desempeño realizou ata o momento nun rol que non é a súa posición habitual, aínda que podería regresar á sagunda liña.
Alevín e Alejandra son baixa por lesión
Ademais, hai que sumarlle a volta de Jess, ausente a pasada xornada en Sant Cugat. Jos Portos, Pakito Usero e Juan Carlos Fernández terán que compoñer un XV inicial no que non repetirán Alevín e Alejandra, ambas as lesionadas, nin Ceci, fóra de España por motivos académicos.
Así, as convocadas polo trío de técnicos galegos para recibir ao Crealia El Salvador son: Divi, Copi, Nicky, Ali, Maica, Miriam, Tere, Valle, Kyra, Pimi, Rumi, Maria Morant, Judith, Anna Caplice, Alba Lalín, Leire Gorrotxategi, Anita, Quen, Mariana, Elsa, Tania e Jess.
Dos seis compromisos que quedan por disputar ao CRAT Residencia Rialta na Liga Iberdrola de rugby, catro deles serán en Elviña. Xogar como locais debe ser sinónimo de vitoria, o CRAT quere demostrar a súa fortaleza en casa, algo que lle permitirá engancharse de novo á loita polo título.
Así chega El Salvador
O adestrador do rival do CRAT, Michael Walker-Fitton, declaraba á web do seu equipo na previa do partido que nesta novena xornada e ante as coruñesas o conxunto de Valladolid atópase “diante dun partido que chega despois dun parón moi longo, cun desprazamento afastado, pero confiamos en que isto non nos vai a afectar”.
O técnico de Crealia El Salvador explicaba tamén que o equipo que adestra “traballou a un gran nivel durante as últimas semanas de adestramento, e imos co obxectivo de conseguir a vitoria lonxe de Pepe Rojo, xogando o rugby que nos gusta. Todas as xogadoras están moi motivadas, e con moitas ganas de facer un gran partido”.
O cruce entre o CRAT Residencia Rialta e o Crealia El Salvador vai ser arbitrado polo colexiado Iñaki Muñoz, do comité madrileño. Como é habitual, o encontro poderá seguirse ao vivo en liña na páxina da Federación Española de Rugby ferugby.tv, con rexistro de balde.
Máis partidos do CRAT noutras categorías
Pero este non é, nin moito menos, o único compromiso do CRAT Residencia Rialta este sábado. Tamén no Estadio Universitario de Elviña, despois do CRAT-Chami, o equipo feminino de Liga Galega enfróntase ao Santiago Rugby ás 18 h.
Na Cidade Deportiva Arsenio Iglesias, o CRAT Cesuga, da liga Galega M14, recibe ao C.R. Ferrol ás 12:30 h. Na Torre tamén, pero ás 15:30, o equipo de Liga Galega Masculina disputará o seu encontro co Universidade de Vigo.
Por último, na liga M18, o conxunto de Unión do Norte do que forman parte xogadores do CRAT xoga ás 16 h en Ourense diante o combinado local.
