O CRAT Residencia Rialta recibe a Coterva Cocos, líder da Liga Iberdrola, mañá sábado 11 de marzo ás 16 horas en Elviña. As coruñesas están a un punto do cuarto posto que é o que dá acceso ás semifinais polo título. Non hai mellor rival nin momento máis apropiado.
Faltan tres xornadas da fase regular da liga Iberdrola e o CRAT Residencia Rialta depende de si mesmo para alcanzar os play-offs. Quen dixo medo? Pola súa banda, as sevillanas do Coterva Cocos, actuais campioas de liga, suman dez vitorias e só unha derrota.
A pasada xornada diante o Complutense Cisneros, o CRAT Residencia Rialta demostrou a súa fortaleza como local. As galegas adoitan ter uns finais de partido fantásticos e, do 26-24 a falta de 12 minutos, pasouse ao 45-24 final. Como referencia, Coterva Cocos venceu a Complutense 15-18 fai dúas xornadas. Esta tempada, a Liga Iberdrola está máis igualada que nunca!
Complutense Cisneros é o último clasificado cunha vitoria, as andaluzas son as líderes cunha única derrota e, no seu último enfrontamento, só un ensaio a falta de dous minutos decantou a balanza ao lado sevillano. Para o partido de mañá en Elviña resulta difícil facer un prognóstico, aínda que si que hai algo seguro: a solidez do CRAT Residencia Rialta como local.
Para este duelo, non hai moitas novidades no apartado de altas e baixas. O CRAT Residencia Rialta contará co mesmo bloque que se enfrontou ao Complutense Cisneros hai unha semana. A convocatoria local compóñena Valle, Maica, Elsa, Jess, Nicky, Miriam, Alborota, Quen, Ali, Kyra, Mariana, Ceci, Pimi, Copi, Anna Caplice, Divi, Maria Morant, Judith, Leire Gorrotxategi, Anita e Alba Lalín.
En Elviña espérase rugby de máxima categoría. Dous equipos que van a por todas. No tepe herculino ante as coruñesas estará o mellor rival posible: as líderes e actuais campioas. Por diante, un reto magnífico: gañar ao mellor equipo da máxima categoría (neste momento) e meterse de cheo na loita polo título.
É a ocasión ideal para que as persoas que aínda non coñezan a espectacularidade do rugby feminino tomen a decisión de se achegaren ao campo de Elviña a gozar do equipo da súa cidade. Quen se anima?
