A Liga Iberdrola de rugby está a ter moitos obstáculos para desenvolverse con normalidade. Esta xornada, estaba previsto que o CRAT Residencia Rialta viaxase a Andalucía para enfrontarse ao Cortevas Cocos Rugby pero este duelo de xigantes terá que esperar.
Un caso positivo detectado no plantel do club coruñés obriga a todo o equipo a pasar unha corentena preventiva. Por iso, desde o CRAT xa lle solicitaron á Federación Española de Rugby o aprazamento do seu partido contra as Cocodrilas, correspondente á terceira xornada de Liga.
Este será o segundo partido adiado (de tres) para as herculinas. A segunda xornada competitiva non seu puido celebrar na División de Honor de rugby debido ao temporal Filomena. Agora, a COVID-19 é a que pon trabas ao deporte oval.
O CRAT so xogou un partido
Así, o estreo do 2021 nos terreos de xogo para o equipo dirixido por Jos Portos e Helen Roca deberá agardar un chisco máis. Polo de agora, as xogadoras do CRAT asinaron un gran estreo na máxima categoría, cunha vitoria ante o Sanse Scrum logrando unhas sensacións que querían manter para o resto da tempada.
Algo que sen dúbida resultará máis difícil, agora que o parón de Nadal, Filomena e a COVID-19 aliñánse para frear o deporte. A seguinte cita, se nada o impide, para as do CRAT será o 23 de xaneiro, ante o CR Complutense Cisneros.
Pues toca CRUZ….#AúpaCRAT https://t.co/BWY2JOClj5
— Jos Portos🌈 (@Jap_69) January 15, 2021
