Ao CRAT Residencia Rialta faltoulle tempo para consumar a remontada. Tras dominar o partido nos minutos iniciais, viu como o CR Olímpico Pozuelo dáballe a volta e chegaba á parte final con oito puntos de renda.
As galegas conseguiron anotar e poñerse a un, pero tarde, na última xogada. O escaso botín que traen para A Coruña é un punto de bonus defensivo sumado diante un rival directo. Aínda así, tras este partido, as semifinais están a catro puntos, máis preto que hai unha semana. Queda moito por decidir nas catro últimas xornadas da liga Iberdrola de rugby.
Ceci desprazouse desde Alemaña para xogar o partido
O CRAT Residencia Rialta presentou un XV inédito en Pozuelo. No seu segundo partido esta campaña, Mariana xogaba de á desde o inicio xunto con Jess. A parella de flankers formábana Judith e Valle, actuando Anna Caplice esta vez de número oito. Repetía Anita de medio apertura e en primeira liña formaban de saída Miriam, Ali e Maica. Ceci, recentemente chegada de Alemaña só para xogar este duelo, tamén estaba na aliñación de partida.
O comezo foi prometedor. Primeiro Ceci e despois Mariana déronlle unha vantaxe de 3-12 ao CRAT Residencia Rialta.
As madrileñas, nos primeiros compases do encontro, víronse superadas por un CRAT Residencia Rialta moi ambicioso. A xogada do ensaio de Mariana Romero premiou o seu decoro e a súa experiencia para lograr pousar tras loitar o balón co pé e impoñerse en carreira.
O CR Olímpico de Pozuelo foi, aos poucos, meténdose no partido. As locais fiaban as súas opcións principalmente á patada de Ana Sánchez, aínda que non sempre lles saíu ben. O CRAT Residencia Rialta vía como o empuxe do Olímpico ía igualando o xogo e no minuto 34 chegou finalmente o ensaio das pozueleras con premio extra. Só dous puntos de vantaxe para as galegas ao descanso.
A segunda parte empezou co CR Olímpico Pozuelo apertando máis. Só erros en adiantados e retencións freaban ás madrileñas. O CRAT Residencia Rialta recompoñíase e tamén daba a réplica. Era un partido aberto. As olímpicas, de novo a paus, poñían o 13-12 no marcador. Consumaran a remontada.
Cunha patada para seguir e moita fortuna en que o balón non saíse por liña de fondo, o Olímpico pousaba por medio de Crossley de novo e ampliaba a diferenza. Do 3-12 dos minutos inciales a un 20-12 a falta dun cuarto de hora para o final.
Había marxe para reverter a situación pero a ambos os conxuntos custáballes chegar á liña de 22. O CRAT Residencia Rialta conseguiu anotar tarde, no último minuto, cun ensaio de Maria Morant e transformación de Anita. Non había tempo para máis. As galegas quedaron a un punto do CR Olímpico Pozuelo.
Trátase dun duro revés tal e como comezou o partido e despois da derrota de Sant Cugat diante do Eibar que poñía as semifinais ao alcance das coruñesas do CRAT.
O seguinte compromiso das herculinas será como conxunto local no campo de Elviña contra do Complutense Cisneros, xa en marzo. Sant Cugat segue no cuarto posto, o desexado polo Eibar, Olímpico e tamén polo CRAT Residencia Rialta. Con todo, a lectura positiva é que só hai catro puntos de diferenza entre as coruñesas e as catalás grazas ao momento por bonus defensivo logrado nesta xornada.
FICHA TÉCNICA
20) OLÍMPICO POZUELO: María del Castillo (min. 17 entra Ana Gómez de Olea), Beatriz Sanjurjo (min. 52 entra Hannah Persson), Sidorella Bracic; Miriam Vega (min. 65 entra Amanda Prado), Marta Arriola; Lía Piñeiro, Isabel Ruiz (min. 62 entra Ana Cabo), Cristina García (min. 72 entra Paloma Cabezas); Andrea García (min. 57 entra Blanca Barriuso), Magali Harvey; Laura Arnaiz (min. 42 entra Chiara Pisu), Silvia Morales, Caroline Crossley, Ana Sánchez e Inés Spinola.
19) CRAT RESIDENCIA RIALTA: Miriam (min. 25 entra Nicky), Ali, Maica; Kyra, Pimi (min. 72 entra Rumi); Judith, Valle (min. 44 entra Maria Morant), Anna Caplice; Alba Lalín, Anita; Jess (min. 45 entra Maitane), Quen, Ceci, Mariana (min. 51 entra Leire Gorrotxategi) e mais Elsa.
ANOTACIÓNS:
- 0-7 min. 4: ensaio de Ceci e transformación de Anita.
- 3-7 min. 14: golpe de castigo transformado por Ana Sánchez.
- 3-12 min. 17: ensaio de Mariana.
- 10-12 min. 34: ensaio de Caroline Crossley e transformación de Ana Sánchez.
- 13-12 min. 52: golpe de castigo transformado por Ana Sánchez.
- 20-12 min. 64: ensaio de Caroline Crossley e transformación de Ana Sánchez.
- 20-19 min. 80: ensaio de Maria Morant e transformación de Anita.
EQUIPO ARBITRAL: Félix Villegas.
INCIDENCIAS: Partido disputado no Estadio do Valle de las Cañas, en Pozuelo de Alarcón (Madrid), correspondente á décima xornada da liga Iberdrola de rugby.
