Mañá, sábado 29, o CRAT Residencia Rialta disputa no campo coruñés de Elviña (17:00 horas) o partido máis decisivo da tempada ata o momento. Será contra o Crealia El Salvador, colista. As deportistas herculinas son o único equipo galego que milita na máxima categoría do rugby español e xóganse entrar ou non na disputa do play-off polo título. So hai sitio para catro equipos, e elas son quintas.
O primeiro chanzo deste reto pasa por gañar, si ou si. O segundo é que o fagan, preferiblemente, con bonus xusto o que lles faltou a xornada pasada diante do Olímpico Pozuelo. Alí, gañar, non foi abondo.
O CRAT quere optar a loitar polo título
Para poder gañarlle a partida ao Sanse Scrum, que é o equipo que ocupa a cuarta posición na táboa clasificatoria na Liga Iberdrola, o triunfo e o bonus teñen que ir da man. Pero, aínda así, quedaría un último chanzo nesa escada que leva ao Top4, as galegas precisan que o Sanse Scrum perda diante do Olímpico Pozuelo. Non dependen de si mesmas.
O partido das coruñesas contra das vallisoletanas do Crealia El Salvador, será arbitrado por Santiago Castro e poderá verse a través de internet nesta canle:
Pola súa parte, o Sanse Scrum xoga o domingo ás 12:00 horas diante do Pozuelo. As xogadoras que adestra María Ribera mídense a un rival que non se xoga nada. Elas si. Moito. Dependen de si mesmas se gañan con bonus, nada poderá facer o CRAT Residencia Rialta para dicir adeus ao seu soño de pelexar pola Liga.
