O CRAT Residencia Rialta é case intratable en Elviña. O Eibar foi a súa última vítima cun tanteo de 26 – 17. De feito, só o Majadahonda conseguiu saír vitorios da Coruña. Pola contra, o conxunto herculino foi incapaz de gañar como visitante. Esa irregularidade condenouno a non poder disputar o título da Liga Iberdrola neste tempada 2022-23
O triunfo de Sant Cugat en Madrid o sábado diante Complutense Cisneros restaba emoción ao compromiso final do CRAT Residencia Rialta nesta campaña de Liga Iberdrola.
Mariana Romero abriu o marcador cun ensaio sen premio extra. Maica Martí pousou e Anita transformou para poñer o 12-0 co que se chegou ao descanso.
Dominio completo das coruñesas que mantiveron con solvencia as ofensivas do Eibar na primeira metade. As vascas estaban tamén coa mente nos despachos pendentes da sanción (suspendida preventivamente polo Tribunal de Arbitraxe Deportiva) que lles afastaba das semifinais.
O segundo tempo comezou coa mesma disposición e, como non, Mariana, ensaiou de novo. O Eibar tirou de orgullo e conseguiu inaugurar a súa marcadora. Judith viu a tarxeta amarela e o conxunto vasco aproveitou a superioridade para pousar e achegarse cun 19-10 no marcador.
Bonus ofensivo para o CRAT
O trío de adestradores do conxunto galego, conformado por Pakito Usero, Jos Portos e Juan Carlos Fernández, comezaron a facer substitucións e unha das recentemente ingresadas, Tania, poñía ao conxunto coruñés, tras transformación de Anita, coa vantaxe suficiente para sumar bonus ofensivo: 26-10.
É dicir, de caer Sant Cugat en Cisneros sen bonus defensivo, o CRAT, no minuto 70 estaría clasificado para as semifinais.
Pero, claro, esta non era a realidade. Eibar, a dous minutos do final, sumou de novo para establecer o definitivo 26-17, un resultado que non ten transcendencia para obter o billete para os play-offs polo título da Liga Iberdrola de rugby.
Coa clasificación actual, sen aplicarlle a sanción a Eibar, o CRAT Residencia Rialta finaliza esta Liga Iberdrola en quinto lugar, a dous puntos de entrar nas semifinais. Se o TAD finalmente sancionase ás armeiras, o CRAT Residencia Rialta seguiría sendo quinto, aínda que, neste caso, a catro puntos de Sant Cugat.
Con todo, as coruñesas levan un sabor agridoce polo seu rendemento tan dispar cando se comparan resultados en Elviña e como visitantes. A un pasito da loita polo título, o CRAT Residencia Rialta viviu unha tempada repleta de cambios no corpo técnico e no persoal, que finaliza con novo presidente e xunta directiva e, probablemente, con máis novidades no banco.
Por diante, novas citas no calendario como a Copa da Raíña de seven. Tocará esperar uns días para comprobar os cambios que se aveciñan no club coruñés.
FICHA TÉCNICA
26) CRAT RESIDENCIA RIALTA: Nicky, Ali, Maica (entra Miriam min. 52); Kyra (entra Copi min. 62), Pimi; Divi (entra Valle min. 30), Judith, Maria Morant; Alba Lalín (entra Leire Gorrotxategi min. 59), Anita; Quen, Elsa (entra Alborota min. 52), Ceci, Mariana e Jess (entra Tania min. 67).
17) EIBAR: Edurne, Doha (entra Idoia Goya min. 36), Eider (entra Ihintz min. 71); Jone Carral (entra Iana Garmendia min. 61), Lorea Segovia; Nerea García, Águeda (entra Iraide Toyos min. 74), Aleuzenev Cid; Yamila Otero, Steffi Hooson; Naroa López, Paula Ghiorzi, Serena Liu, Adara e Amaiur Mayo.
ANOTACIÓNS:
- 5-0 min. 17: ensaio de Mariana.
- 12-0 min. 27: ensaio de Maica e transformación de Anita.
- 19-0 min. 42: ensaio de Mariana e tranasformación de Anita.
- 19-5 min. 51: ensaio de Steffi Hooson.
- 19-10 min. 63: ensaio de Yamila Otero.
- 26-10 min. 70: ensaio de Tania e transformación de Anita.
- 26-17 min. 78: ensaio de Amaiur Mayo e transformación de Adara Alfonso.
EQUIPO ARBITRAL: Belarmino Álvarez. Amosou cartón amarelo á xogadora local Judith no minuto 61.
INCIDENCIAS: Partido correspondente á última xornada da Liga Iberdrola disputado no Estadio Universitario de Elviña, na Coruña.
