A cita deste domingo, 14 de novembro, será unha das máis importantes da tempada para o CRAT Residencia Rialta. As xogadoras que adestra a dupla conformada por Jos Porto e Helen Roca viaxarán a La Cartuja para enfrontarse ao Corteva Cocos Rugby a partir das 11:30 horas e tentar regresar á senda da vitoria ante un rival directo.
#LigaIberdrolaRugby | Resultados y clasificación tras las Jornada 5 🏉💚 pic.twitter.com/h6RhWCG8Fv
— LigaIberdrolaRugby (@DHIberdrola) October 31, 2021
O principal obxectivo das coruñesas pasa por afastar as malas sensacións do último partido na casa ante o Majadahonda. Ademais dunha contundente derrota (7-33), o CRAT sufriu as lesións de Selene e de Divi e rompeu unha racha de dúas vitorias consecutivas que as situaba con oito puntos na táboa clasificatoria.
CRAT e Cocos, rivais directos na táboa
Precisamente para regresar a esa tendencia terá que medirse cun Corteva Cocos que só perdeu un dos catro encontros disputados ata o de agora na Liga Iberdrola. O cadro andaluz colleitou no seu último partido un empate a 14 na súa visita ao Olímpico de Pozuelo.
O deste domingo será un duelo directo no medio da táboa que podería marcar as diferenzas para o que resta de tempada. O CRAT, sexto con oito puntos, tentará superar na clasificación ao Corteva, quinto con dez. Un punto máis separa ás herculinas do cuarto posto, que marca o Olímpico de Pozuelo con 11 puntos.
Co regreso de Paula e Cecilia dos seus compromisos internacionais, Jos Porto contará con xogadoras de reforzo para competir cara a cara en Sevilla loitar por unha vitoria que resultaría chave para as aspiracións do CRAT Residencia Rialta.
