O CRAT Residencia Rialta xoga mañá domingo (11:30 horas) en Majadahonda na penúltima xornada da liga Iberdrola de rugby. As locais, segundas clasificadas, foron as únicas que non perderon en Elviña, un duro rival no camiño das coruñesas para acceder ás semifinais. O partido corresponde á xornada 13ª.
Tras vencer ás vixentes campioas da pasada campaña, Coterva Cocos, o CRAT Residencia Rialta afrontaba os seus últimos dous compromisos dependendo só de si mesmo. Todo cambiou tras a resolución do Comité Nacional de Arbitraxe esta semana. Eibar, equipo que ocupaba o cuarto posto, foi sancionado por aliñación indebida de Yamila Otero, xogadora arxentina que non cumpría cos criterios para ser xogadora de formación. Ao conxunto vasco déuselle por perdido o seu partido contra Sant Cugat, restándolle dous puntos a maiores na clasificación.
Deste xeito, Eibar pasaba dos seus 29 puntos aos 22 actuais. Por contra, o Sant Cugat sumaba 5 puntos para alcanzar ao CRAT Residencia Rialta con 27. Así, galegas e catalás, empataban na cuarta posición pero, xa que Sant Cugat ten máis vitorias no seu haber, finalmente o CRAT quedaba por baixo.
Esta rocambolesca situación non achega máis ás coruñesas ao seu obxectivo. Antes, o CRAT Residencia Rialta, gañando os seus dous partidos, sabía que era equipo de play-off, pois a última xornada enfróntase ao, entonces, rival directo Eibar. Agora, Sant Cugat é o equipo para bater e non hai ocasión para un choque directo. O reto é máis complexo.
O CRAT non poderá contar con Ali
Non hai tempo para queixumes. Se o CRAT Residencia Rialta puido cos intratable Coterva Cocos, o Majadahonda debe temer ás coruñesas.
Iso si, a expedición galega terá que repoñerse á baixa de última hora de Ali, unha das habituais da primeira liña. A convocatoria, de só 20 xogadoras, non ten máis novidades con respecto ao choque do pasado sábado diante Coterva Cocos.
É agora ou nunca, o CRAT debe gañar, sumar bonus se é posible, e esperar que Sant Cugat non faga o mesmo. Non se pode pedir máis emoción para o tramo final da fase regular.
