O porto de Aguiño acolleu este domingo a penúltima xornada da Liga Galega de Traiñeiras Feminina do Trofeo Xunta de Galicia. Alí as remeiras da traiñéira do CR Cabo da Cruz venceron. Este triunfo supón que cun quinto posto na próxima regata a disputarse na Coruña, xa se proclamarían campioas. Así, a embarcación feminina do CR Cabo da Cruz achegouse aínda máis ao título gañando en Ribeira.
⏱🏳🚣🏼TEMPOS e CLASIFICACIÓN da III BANDEIRA FEMININA CONCELLO DE RIBEIRA
Parabéns @crcabodacruz #LigaF#LGT22#trofeoxuntadegalicia22#NON@Xunta @camino_xacobeo @deporte_galego @sputniksports @TGM_toldosgomez @FrescoCongelado #BeEnergy
💻📸 @difusion_sport pic.twitter.com/omlS7MO2eE— LigaLGT (@Ligalgt) August 21, 2022
Nun formato tradicional, a tres quendas, sen ser lanzadas, e con tres traiñeiras por manga, as primeiras en saír a competir pola III Bandeira Feminina Concello de Ribeira foron Puebla, Ribeira e Salgado – Perillo. O equipo anfitrión, empurrado polo seu público, mostrou unha imaxe totalmente diferente á do día anterior, liderando con claridade a súa quenda, superando a Puebla e Salgado – Perillo. Dúas traiñeiras que nesta regata tiveron unha batalla moi igualada. Comezaron segundas as de Oleiros a 4 segundos de Puebla. Unha diferenza que as da Carmela foron recortando segundo a segundo ata poñerse por diante na última virada e consumando a remontada no último longo.
E se a vitoria de Ribeira foi clara, a de Tirán – Pereira na seguinte quenda o foi aínda máis. Sen dar opcións a Castropol e Rianxo, a traiñeira de Moaña superou por máis dun minuto as súas rivais. Segunda foi Castropol, que a diferenza do acontecido habitualmente, as asturianas superaron a Rianxo. Ademais, fixeron cun tempo mellor que o de Ribeira, resultado clave na loita que teñen ambas traiñeiras pola sexta posición posición da LGT , agora a favor das da Ría del Eo por dous puntos.
CR Cabo da Cruz ten o título moi preto
Na quenda de honra, a líder deu un paso máis para facerse co título. Liderando dende o principio ata o final, CR Cabo da Cruz xa fai contas: 4 puntos para gañar a liga. Unha liga que aínda ten posibilidades de gañar CR Chapela – Wofco. O reto é complicado, pero as de Arealonga non perden a fe.
Na regata de Ribeira volveron quedar segundas, freando calquera intento de remonta e de repetir a xesta do día interior de Mugardos – A Cabana Ferrol, que quedou terceira da serie e finalmente tamén da bandeira logo dunha batalla moi interesante cos tempos de Tirán – Pereira. Xa que en cada virada alternaban a terceira posición cada unha das dúas traiñeiras, de feito a maior diferenza foi a favor das de Moaña na última virada, 6 segundos por diante, pero no último longo Mugardos – A Cabana Ferrol conseguiu superar ese tempo e afianzarse na terceira posición por menos de 1”.
Samertolameu-Oversea dálle unha volta á liga masculina desbancando a Bueu-Teccarsa
A Liga Galega de Traiñeiras-Trofeo Xunta de Galicia completou este domingo a súa penúltima fin de semana de competición con dúas regatas e nunha delas saltou a sorpresa de xeito maiúsculo. Bueu-Teccarsa chegaba a Cesantes á fronte da xeral da Liga A con 5 puntos de vantaxe, pero perdeu o liderado, agora nas mans de Samertolameu-Oversea.
O acontecido na XXXVI Bandeira Concello de Redondela entraba en moi poucos prognósticos. Bueu-Teccarsa, que nas doce regatas anteriores non baixara do terceiro posto, finalizou sétima. Entre as traiñeiras que superaron ao conxunto que viña de gañar a véspera en Mugardos estivo Cesantes-Rodavigo, o conxunto máis rápido da primeira quenda.
Os locais xogábanse con Puebla, á que avantaxaban en 3 puntos, eludir o play-off de permanencia e dende o primeiro dos seis longos dominaron con total autoridade a súa serie. Cesantes-Rodavigo superou por 39” á Carmela, terceira na quenda por detrás de Narón. Cuarta concluíu Mugardos, a outra traiñeiras que pugnará por manter a categoría a vindeira fin de semana na Coruña.
A quenda intermedia ofreceu unha dobre pugna. Rianxo e Mecos botaron un pulso pola primeira posición, coa Mequiña sempre perseguindo, pero sen deixar que se escapara a Virxe da Guadalupe. Os do Barbanza gañaron o cara a cara por 5” de diferenza e ambas melloraron o tempo de Cesantes. Simultaneamente, a filial de CR Cabo da Cruz e Mera comezaron o último longo igualadas e o equipo de Boiro terminou decantando a balanza ao seu favor por menos de 1”.
O vento non deixaba de ir a máis e ese factor fixo saltar a banca na quenda de honra. Malia levar a iniciativa en todo momento, Samertolameu-Oversea continuaba a metade da regata sen poder cos parciais de Rianxo e sendo só 1” mellor que Mecos. A 9” da Terca realizou a terceira virada Bueu-Teccarsa, por detrás das referencias de Cesantes, de Mera e empatada na sexta posición coa embarcación do CR Cabo da Cruz. Tirán-Pereira ocupaba a oitava praza e Chapela-Wofco, que cometeu un erro nesa ciaboga, víase relegada ao último posto.
Con un panorama nunca visto esta campaña, o maremoto na xeral da Liga A confirmouse na segunda parte da regata. Mellor que Rianxo na cuarta virada, pero peor na quinta, Samertolameu-Oversea non desaproveitou a oportunidade no último longo. Asinou o mellor tempo, batendo por 5” o da Virxe da Guadalupe, e o seu soño de vestirse de líder foise facendo realidade co paso dos segundos.
Bueu-Teccarsa non conseguiu recuperar ningunha posición e fixo sétima, un resultado que provocou o inesperado sorpasso no máis alto da xeral. Tras vestir a camisola amarela dende o arranque da liga, A Mariñeira chegará á última xornada un punto por debaixo da Terca, aínda que dependendo de si mesma. A que quede por diante o sábado na Coruña farase co título.
CR Cabo da Cruz gaña a IV Bandeira Feminina Reganosa en Mugardos tras remontar ante Chapela – Wofco
