Nesta mañá de domingo (6 de decembro) visita ao HC Borbolla na súa cancha de Monte Alto o Magic Studio CP Manlleu, as actuais campioas da OK Liga. A cita está marcada para as 11:15 h. As coruñesas, colistas, precisan puntuar así advirten que non tiran a toalla e que loitarán por dar a sorpresa.
O HC Borbolla recibe ao segundo clasificado, o Magic Studio CP Manlleu, sen baixas. As xogadoras galegas están esixidas polas circunstancias que lles obrigan a vivir todos os partidos como finais de aquí ao final deste tramo da competición. “Por sorte, temos outro partido máis con toda a plantilla disponible”, apuntaba o adestrador das herculinas, Santi Martínez.
Santi Martínez, adestrador do HC Borbolla: “O CP Manlleu é un rival moi complicado. É o actual campión de Liga e posiblemente o rival máis forte da tempada actual”
O técnico das galegas é consciente da dificultade do cruce cun equipo como o Manlleu que ocupa a segunda praza, moi preto do líder, o Cerdanyola. “É un rival moi complicado. É o actual campión de Liga e posiblemente o rival máis forte da tempada actual”, avisa o entrenador coruñés.
Imporse ao CP Manlleu é unha tarefa titánica pero as coruñesas non lles queda outra que intentar, canda menos puntuar.
Na escuadra rival, o técnico Santi Martínez di que é complicado salientar so a unha xogadora “todas son moi boas, destacar a unha xogadora da súa plantilla é difícil. Son das mellores do mundo. Están Casarramona, Peke…”
Santi Martínez, adestrador do HC Borbolla: “Vai ser un partido complicadísimo pero debemos afrontalo como todos, facelo o mellor posible e loitar ata o final”
No equipo vermello e negro teñen os pés na terra pero non deixarán de intentalo. “Vai ser un partido complicadísimo pero debemos afrontalo como todos, facelo o mellor posible e loitar ata o final para tentar dar a sorpresa”, di Santi Martínez.
O CP Manlleu, un bloque que golea sempre que pode
Na primeira volta o CP Manlleu gañou 4-0 ao HC Borbolla. As catalás son segundas pero teñen pendente de xogarse o partido contra o ENE Oposiciones Cuencas Mineras da cuarta xornada que foi aprazado no seu momento. Non teñen piedade e golean cando poden. Ao Girona endosábanlle 4-0 na primeira volta e 3-10 na segunda. Co Alcorcón gañaron 9-1. Impuxéronse ao conxunto de Las Rozas 3-0 na primeira volta e 5-0 na segunda. Incluso ao actual líder, o Cerdanyola, lle gañaron por 7-2.
Con estas cifras parece obvio que tentar que a súa meta se perfore o menos posible, é un dos retos que terá hoxe o HC Borbolla se non quere quedarse fóra do partido.
