Mañá domingo 27 de marzo toca xornada de hoquei a patíns matutina para a afección coruñesa. O HC Deportivo Liceo recibe ás 12:30 no Palacio dos Deportes de Riazor ao CP Las Rozas.
A pasada semana as galegas cortaban a súa serie de seis triunfos consecutivos ao caer derrotadas diante o Generali HC Palau de Plegamans por 6-2. Ese tropezo, diante das terceiras, non levou aparellado que as galegas abandonasen o seu bo xogo e, seguramente, non será un impedimento para que as coruñesas, esta xornada 19ª e ante un rival máis asequible, non recuperen o costume de sumar de tres.
A confianza e a idea de éxito non se foron e, en base a iso, o HC Deportivo Liceo tentará lograr tres novos puntos fronte a CP Las Rozas (domingo 27/3/22, 12:30 h).
O Palacio dos Deportes de Riazor será o escenario da 19º xornada da OK Liga Feminina, competición con cada vez menos datas restantes de fase regular. Con esta serán oito. O técnico, Stanis García, e as xogadoras que adestra, sétimas con 28 puntos, aínda teñen camiño por percorrer.
O CP Las Rozas é un rival pouco regular
O conxunto madrileño do CP Las Rozas é un dos protagonistas da loita por evitar o descenso. É o actual antepenúltimo con once puntos acumulados, así que a súa visita a Galicia será realmente importante para abrir brecha co Vilanova (penúltimo). Aínda que o factor motivación terá moito que dicir, os datos non xogan ao seu favor. O CP Las Rozas, por exemplo, é o segundo peor equipo en canto a goles anotados: 25 en 18 xornadas.
O seu maior activo ofensivo é a italiana Giulia Galeassi, autora de once. O precedente da primeira volta, celebrado no Centro de Patinaxe madrileña, deixou unha vitoria para o HC Deportivo Liceo (1-4).
Bea Gaete non pode entrar aínda na lista de convocadas do Liceo
O técnico liceísta, Stanis García, aínda non poderá contar coa chilena Bea Gaete, baixa a medio prazo tras ser operada. Por tanto, a convocatoria quedará formada polas seguintes xogadoras: Viki Caretta, Mencía Mosquera, Luchy Paz, María Sanjurjo, Adriana Soto, Alba Garrote, Ale Martín, Lara Yáñez, Lucía Yáñez e Cris Diz.
Sabes como acudir a ver o partido ao vivo a Riazor?
As persoas socias do club verdibranco entrarán ensinando o seu carnet dixital. Para o resto organizáronse os dous escenarios habituais de adquisición. Lembramos cales son eses escenarios:
- As persoas abonadas ao RC Deportivo teñen 500 pases gratuitos dispoñibles. Non existirá máis custo que o tempo adicado á xestión, a levar a cabo mediante o seguinte link de CLUBER: https://bit.ly/3Ir0icl. No momento da chegada ós aledaños do Pazo dos Deportes, as persoas que apliquen esta posibilidade terán a obriga de presentar dous documentos: o código QR proporcionado por Cluber e o carnet do Real Club Deportivo.
- O público xeral que desexe asistir ó encontro conta con entradas a un prezo de 5€. Adquiriranse de xeito online mediante outra ligazón de CLUBER: https://bit.ly/3L6mV7L
Normativa sanitaria de acceso ao Palacio dos Deportes de Riazor
Trala publicación do DOGA do 17 de decembro esíxese que, nas instalacións deportivas que esperen unha afluencia superior a 200 espectadores, se comprobe antes do acceso que os asistentes maiores de 12 anos estén en posesión dalgún documento que acredite unha destas situacións:
- Que recibiron a pauta completa dunha vacina contra a COVID-19 para a cal se concedeu unha autorización de comercialización, de conformidade co Reglamento (CE) nº 726/2004.
- Que dispoñen dunha proba diagnóstica negativa realizada nas últimas 72 horas, no caso das PCR, e 48 horas no caso dos tests de antíxenos. No caso dos tests rápidos de antíxenos, deberán están enumerados na lista común e actualizada de tests rápidos de antíxenos da COVID-19 establecida sobre a base da Recomendación 2021/C 24/01 do Consello de Europa.
- Que o titular se recuperou dunha infección polo SARS-CoV-2 nos últimos 6 meses. Para iso, a persoa debe ter sido diagnosticada como caso confirmado da COVID-19 fai 11 días ou máis mediante unha proba PCR, non sendo válido outro tipo de test.
