A Xunta vén de anunciar no Diario Oficial de Galicia unha serie de novos requisitos que deberán cumplir os equipos deportivos que participan en competicións oficiais non profesionais de ámbito estatal. Nas medidas ás que facemos referencia, inclúese a obriga dos equipos de fóra de Galicia que veñan xogar á nosa comunidade autónoma a se faceren test serolóxicos da COVID-19 entre 72-24 horas antes da súa viaxe, tamén que as xogadoras galegas deberán facerse probas cada 14 días.
A orde da Xunta de Galicia publicouse do 30 de setembro de 2020 e modificación de determinadas medidas previstas no Acordo do Consello da Xunta de Galicia, do 12 de xuño de 2020, sobre medidas de prevención necesarias para facer fronte á crise sanitaria ocasionada polo COVID-19, unha vez superada a fase III do Plan para a transición cara a unha nova normalidade.
Test COVID cada 14 días
En virtud desta orde autonómica, o deporte galego non profesional que compita no ámbito estatal terá que pasar test serolóxicos cada 14 días. E, ademais, todos os equipos que veñan a Galicia desde comunidades autónomas estarán obrigados a facelo entre 72 e 24 horas antes de viaxar a Galicia para cada competición.
Así o aprobou a Xunta no novo DOG, no que modifica o acordo do Consello da Xunta de Galicia, do 12 de xuño, no que se establecían as medidas de prevención relativas á práctica deportiva federada non profesional fronte á crise sanitaria provocada pola COVID-19.
A Xunta fala de modalidades de contacto que se celebren en Galicia
No Diario Oficial de Galicia do 30/09/2020 explícase concretamente que “no ámbito das competicións deportivas oficiais non profesionais de ámbito estatal de modalidades deportivas que poidan implicar contacto que se celebren na Comunidade Autónoma de Galicia, serán de aplicación as seguintes medidas:
- Os equipos e deportistas galegos que participen nas ditas competicións deberán realizar os adestramentos e a competición en grupos de composición estable e, en todo caso, deberán realizar test serolóxicos ou probas similares cada 14 días naturais.
- A totalidade dos membros da expedición dos equipos e deportistas procedentes doutras comunidades autónomas que se despracen á Comunidade Autónoma de Galicia para participar nas ditas competicións deberán realizar test serolóxicos ou probas similares en orixe polo menos entre 72 e 24 horas previas á celebración da proba/partido/competición.
- Asemade, deberán comunicar con idéntica antelación ás autoridades sanitarias autonómicas a relación das persoas integrantes da expedición trasladada a Galicia, a data e hora de chegada á Comunidade Autónoma galega e o lugar de aloxamento, así como o tipo de proba de detección COVID-19 a que foron sometidas as ditas persoas”.
Segundo explica a orde referida nesta información as medidas previstas “deben entenderse dentro do necesario respecto ás competencias das autoridades deportivas e sanitarias estatais, polo que serán aplicables sempre que resulten compatibles coas adoptadas polas ditas autoridades e mentres non existan medidas obrigatorias dimanantes delas que ofrezan un nivel de protección equivalente ou similar”.
