Non está sendo un inicio de segunda fase sencillo para o PM Friol, que coordina Covi Regueiro. Despois dunha primeira parte da tempada algo accidentada, as galegas chegan á cuarta xornada da fase de permanencia con só un partido disputado e dous adiados.
Un gromo de COVID-19 no Friol impediu que as lucenses xogaran a segunda e terceira xornada. Agora retoman a segunda fase pola permanencia, na que compiten no grupo Norte D, e son sextas, en posición de descenso e a dous puntos da salvación.
Por iso, a ex futbolista e actual coordinadora do club, Covi Regueiro, asegura que a clave no que resta de curso estará en ir “partido a partido, intentando sumar o maior número de puntos posibles e ao final a tempada ponte onde tes que estar”.
O Friol foi de menos a máis nesta tempada
Non foi a mellor tempada para o PM Friol. Nos primeiros catro meses só sumaron cinco puntos, ata que chegou o parón de Nadal. Neste tempo, o conxunto lucense perdeu partidos “adquiribles por rivais e plantel”, polo que Regueiro asegura que á larga, “botas de menos eses puntos”.
A segunda parte da liga regular sorriu máis ás galegas, que atoparon o seu xogo e comezaron a competir mellor. “O equipo asentouse moito mellor na categoría na segunda parte”, admite a ex xogadora, que apunta admais que, se ben “houbo resultados que se os miras desde fora si son abultados, se analizas o partido somos un equipo moi irregular”.
En poucas palabras, o Friol é capaz do mellor e do peor. Ao longo deste curso as súas futbolistas foron quen de dominar a conxuntos superiores que agora xogan na fase de ascenso, “pero tamén cometemos erros que non son propios da categoría”.
Estes fallos explícanse, segundo Regueiro, pola “falta de concentración, experiencia, pódeselle chamar de moitas maneiras e é o que ao final lastra que non sumes os puntos”. Como ben recorda, “na clasificación o que importa é sumar e non o xogo bonito”.
Covi Regueiro: “Na clasificación o que importa é sumar e non o xogo bonito”
Agora, o Friol está plenamente metido na segunda fase, loitando pola permanencia, e nunha posición complicada. “Cada partido é un mundo, cada partido é unha final”, asegura a ex futbolista, ao mesmo tempo que advirte que non podes prevér o que farán os rivais: “logo o outro gaña contra alguén co que non pensabas que fora sumar e xa te descoloca todo”.
Os filiais e os clubs vascos e cataláns, os máximos rivais na Reto Iberdrola
Ademais, tal e como apunta Regueiro, nesta categoría hai conxuntos que poden despistar. A meirande parte deles son os filiais, xa que “ao final son unha incógnita xornada a xornada, porque son capaces do mellor e do peor”.
Tal e como subliña, estes conxuntos sempre que queiran poden contar con xogadoras acostumadas á disciplina dos primeiros equipos, militantes na Liga Iberdrola. Pola outra banda, estes mesmos equipos poden coller xogadoras dos B para os seus planteis, quedando con menos xogadoras dispoñibles. Outro factor que sinala é o agrupamento de partidos, xa que “cando se acumulan partidos de Liga Iberdrola, Copa ou lesións, pois veñen co equipo mermado”.
En liñas xerais, Regueiro recorda que este tipo de equipos sempre permanece na categoría de prata, porque lle interesa aos seus clubs tanto para o filial como para o primeiro equipo.
Por outra banda, a coordinadora do Friol tamén recoñece a labor dos clubs vascos ou cataláns, cunha cultura de base moi potente. Pola contra, “os equipos da zona de aquí, de Castela e León, Asturias ou Galicia, cústanos moito máis porque non temos tanto de onde sacar e temos que fichar de fóra”. Nos clubs cunha base potente, é máis doado manter unha columna vertebral do equipo e logo construir sobre ela.
Covi Regueiro: “O fútbol feminino está mellorando moito, no sentido de que temos vídeos dos rivais, informes, etc, e ao final coñecémonos todos”
Ademais, outro pequeno hándicap é o feito de que o formato da competición enfronta a equipos que non se viran as caras na primeira fase. Porén, “o fútbol feminino está mellorando moito, no sentido de que temos vídeos dos rivais, informes, etc, e ao final coñecémonos todos”.
A salvación a dous puntos nunha liga “adulterada”
Con todo, a irregularidade desta Liga favorécelle polo de agora ao Friol, que malia só ter xogada unha xornada da segunda fase, está a dous puntos da salvación.
Pero isto non é motivo suficiente de tranquilidade no club lucense, xa que Regueiro apunta que “do que nos queixamos é de que é unha Liga adulterada”.
Covi Regueiro: “Do que nos queixamos é de que é unha Liga adulterada”
Tal e como subliña a coordinadora, o feito de manter os puntos da primeira fase, aínda que ao final da tempada todos xoguen o mesmo número de partidos, fai que os conxuntos cheguen en desigualdade.
“Hai equipos que están loitando na fase de ascenso e non teñen ningún obxectivo xa. E nos que están na fase de descenso, algúns veñen desde febreiro salvados”, denuncia. Esta é unha situación que pon a equipos que se xogan “a vida” como o Friol nunha situación complicada. “Cando non te xogas nada, repartes minutos, pensas na seguinte tempada, non arriscas tanto se tes algunha xogadora tocada. E cando te xogas todo ao final é complicado”, engade.
Sen datas confirmadas para a recuperación de partidos adiados
Con todo por decidir, o que está case asegurado son as datas das recuperacións dos partidos adiados. O Friol ten pendente xogar co Zaragoza e co Seagull, pero as novas datas terán que ser aprobadas polo Comité de Competición.
Un destes duelos terá que ser entre semana, para o que pediron o día 21 de abril, mentres que o outro irá nunha xornada libre. Pero o que prima na Reto Iberdrola é a colaboración entre clubs: “temos que intentar axudarnos todos e niso hai que agradecer que todos os equipos, tanto nós como eles, demos facilidades cando hai casos de COVID, porque todas temos xogadoras que traballan ou compatibilizan cos estudos”.
Covi Regueiro recorda que non é doado compatibilizar as viaxes por toda España coas vidas profesionais das xogadoras, polo que “intentamos axudar ás rivais como nos axudan a nós e poñer un horario favorable para todos”.
Porén, non haberá que agardar ata a recuperación destes partidos para ver ao Friol sobre o campo, xa que as lucenses regresan este domingo 11 ás 19:30 horas, visitando ao UD Collerense.
