- “Xogaramos en Reto e non estabamos habituadas a ver a Primera Nacional, pero ao voltar vimos que hai moito nivel”
- “Temos un plantel bastante descompensado”
Na tempada 2020/2021, o PM Friol perdía a categoría, pasando da Reto Iberdrola á Primera Nacional cun só obxectivo en mente: voltar á segunda mellor división do fútbol español. O conxunto adestrado por Covi Regueiro renovouse case por completo e está a loitar por esa promoción.
Polo de agora, o equipo adaptouse á categoría onde xa suma oito vitorias e tres empates en 13 xornadas disputadas. Con este balance as de Friol son segundas, pero a súa preparadora sinala como o nivel da división aumentou: “A Primera Nacional sorprendeunos”.
As Nosas: Como vivichedes os primeiros meses na Primera Nacional?
Covi Regueiro: A verdade é que primeiro a liga sorprendeunos bastante, porque nós xogaramos en Reto e non estabamos habituadas a ver a Primera Nacional, pero ao voltar vimos que hai moito nivel, é unha liga moi igualada. Hai algúns anos non era tan igualada, había catro ou cinco equipos que competían, pero había outros equipos da parte baixa da táboa, con partidos máis adquiribles, como quen di, que sabias que ias a certos campos e era bastante fácil sacar 3 puntos. O que vemos este ano é que compiten todos os equipos, hai un nivel bastante elevado e ao mellor non é un xogo bonito, pero si en competir e sumar os 3 puntos, así que calquera lle pode gañar a calquera.
Covi Regueiro: “Calquera lle pode gañar a calquera”
As Nosas: E nas últimas xornadas estamos a ver un man a man entre vós e o Interrías
Covi Regueiro: Eu penso que hai moitos máis equipos que non están descartados. Creo que o Sárdoma está a facer unha tempada brutal, creo que o Umia está a sorprender cos resultados que está acadando e o Olímpico de León é un equipo que compite tamén moi ben. E logo tes aos filiais que dependen moitas veces das xogadoras que lles leven os primeiros equipos, pero pódenche complicar un partido perfectamente.
As Nosas: Pero vós dentro do voso plantel tedes a Alicia que é a máxima goleadora do voso grupo
Covi Regueiro: Si, temos a Ali, pero nós temos un plantel bastante descompensado. É completamente novo desta tempada e hai xogadoras que nunca xogaron en certas posicións, entón o tema de adaptarse a esas posicións e das baixas penso que é o que nos está facendo facer unha primeira volta bastante irregular.
As Nosas: Este será un dos aspectos que traballaredes nestas semanas de parón?
Covi Regueiro: Non, estas semanas temos vacacións totais. Son xogadoras que están moi lonxe das súas casas e estes días é importante que polo menos teñan 15 días para recargar, desconectar e volver coas pilas cargadas. Aproveitamos para que descansen. Logo faremos unha mini pretempada para comezar enchufadas a segunda volta.
Covi Regueiro: “Faremos unha mini pretempada para comezar enchufadas a segunda volta”
O calendario para nós tamén é complicado, porque ao ter a todas as xogadoras lonxe e que volvan coas súas familias en Nadal, evidentemente cos temas de vóos e avións, non se pode adestrar nestas semanas. Faremos unha mini pretempada pero é complicado entender que o 19 de decembro non se competira, pero o finde de Reis si. Iso fai que a xente teña que volver antes de fin de ano e é algo que ás veces non é agradable.
As Nosas: E para esta segunda volta, que esperades?
Covi Regueiro: Esperamos ser un pouco máis regulares, non cometer estes erros defensivos. É normal tamén, somos un equipo totalmente novo e descompensado no sentido de que hai moita xente que non xogou en certas posicións e pero se alguén ten que xogar en distintas posicións terá que irse adaptando. E iso ás veces fai que co balón pois si, estean cómodas, pero ás veces hai outros momentos do xogo, como nas transicións en erros a balón parado, nos que cometemos erros que custan puntos.
As Nosas: Cal é a túa aposta polos equipos que ocuparán a zona alta?
Covi Regueiro: Creo que é moi complicado isto. A verdade é que hai moitos candidatos. Ao final tampouco sabes se son dous ou tres os que van poder meterse, porque o feito de que a nosa liga sexa tan igualada tamén fai que ao quitarnos puntos uns aos outros, temos esa desvantaxe do terceiro que non leva tantos puntos como noutros puntos.
Pero penso que candidatos está o Sárdoma, o Interrías por suposto, o Dépor B se engancha, e non sei. O Victoria creo que está bastante lonxe, aínda que para min fai un fútbol bonito e pode coller unha boa racha. Pero eu quedaríame con estes candidatos.
