“A valoración non é positiva porque os obxectivos non se cumpriron”
“Só ofrecimos a renovación a dúas xogadoras, as que considerabamos que si que podían aportar”
A nova estrutura na competición e unha tempada marcada pola COVID, foron algunhas das claves que explican o descenso do PM Friol. As lucenses, únicas representantes de Galicia na Reto Iberdrola no curso 2020/2021, non lograron sobrepoñerse aos hándicaps e para a próxima tempada preparan unha restruturación do equipo.
“Este ano foi o ano máis difícil, estivemos saturados ata arriba”, confesa Covi Regueiro, coordinadora, adestradora e xogadora do club lucense. A un par de semanas do inicio da pretempada, falamos coa polivalente técnica do Friol.
– As Nosas: Que valoración xeral fas desta tempada? Que fallou no Friol?
Covi Regueiro: A valoración non é positiva porque os obxectivos non se cumpriron. Estaba claro que o tiñamos moi difícil, desde o principio da tempada saiu todo torcido. Desde o momento no que se dividiu a competición en subgrupos polo tema da COVID, e en dúas fases, sabíamos que era complicado. Hai unha serie de equipos que son filiales, e por estrutura xa sabes que non optan aos postos de descenso.
Na primeira fase sumamos poucos puntos e na segunda xogamos contra equipos de Cataluña, Aragón e País Vasco e moitos xa viñeron practicamente salvados. Ademais a COVID colleunos nada máis comezar a segunda fase, e estivemos 12 dias sen adestrar, adiando partidos. Á seguinte semana adestramos e logo volvemos xogar sen adestrar polos partidos aprazados.
– As Nosas: Que incidencia tivo a COVID-19 no descenso?
Covi Regueiro: A distribución da competición influiu. Ao final se xogas unha liga regular de todos contra todos, o tema de cando collas a COVID ou os puntos da primeira volta non condicionan tanto na segunda. Cando é unha competición por fases, na que sumas os puntos da primeira á segunda, si que vas condicionado. Todos os equipos tivemos algun contaxio, pero non é o mesmo collelo ao principio ou en nadal, que logo tes un parón, que collelo na segunda fase, cando te xogas o descenso.
Covi Regueiro: “Non todos competimos nas mesmas condicións”
Respecto ao público, a verdade é que se bota de menos. Sobre todo é iso, que non todos competimos nas mesmas condicións, porque cada comunidade tiña restricións diferentes.
– As Nosas: Pódese sacar algún aspecto positivo desta tempada?
Covi Regueiro: Este ano para nós foi o ano máis difícil no Friol, estivemos saturados ata arriba. Como aspecto positivo foron as xogadoras, do filial que tiveron a oportunidade de debutar en Reto Iberdrola. Demostraron o nivel e que estaban preparadas para a categoría e deron realmente a cara e competiron perfectamente.
É un ano para aprender moitas cousas. Quédaste coas oportunidades das xogadoras do filial e os apoios que tiveches. Nos momentos complicados houbo xente que seguiu apoiando, patrocinadores que levan moitos anos con nós e é incrible que nun ano de pandemia, seguiran aportando o seu granito de area. Iso demostra o seu compromiso con nós.
Covi Regueiro: “Quédaste coas oportunidades das xogadoras do filial e os apoios que tiveches”
– As Nosas: Sacar adiante a un equipo de Friol é un esforzo monumental, como vos afecta como club o descenso?
Covi Regueiro: Ao final estamos na categoría na que estivemos un montón de anos, Primera Nacional. Reto a desfrutamos dous anos e esperamos volver, pero é unha categoría na que é moi complicado competir e esixe o máximo. Se te fixas nos equipos compiten en Reto a maioría pertencen a masculinos con estruturas impresionantes. É moi dfícil competir e nun ano de pandemia e na que tes dificultades, nótase esa desigualdade, porque eles teñen máis fácil manter o orzamento ou optan a fichaxes que ti non podes porque non sabes con que ingresos vas contar. Elas teñen un colchón ou un respaldo e ti non o tes.
-As Nosas: Que pasará co filial?
Covi Regueiro: O filial xa tiña unha serie de xogadoras con bastante proxección que adestraban co primeiro equipo e tiveron a oportunidade de debutar. Agora tomamos un tempo de descanso, para restructurar todo e a idea é volver a traballar, coa humildade de sempre, e facendo un equipo para competir e intentar volver a esa categoría. Se pode ser o ano que vén mellor, e se non, sen problema. Seguiremos desfrutando sempre e facendo un proxecto bonito. A idea é desfrutar e competir e que sexa unha liga normal, sen paróns e dificultades e que podamos competir de inicio a final nas condicións óptimas.
Covi Regueiro: “A idea é volver a traballar coa humildade de sempre e facendo un equipo para competir”
– As Nosas: Como estades a preparar a seguinte campaña en Primera Nacional?
Covi Regueiro: A idea do Friol é ascender, pero son obxectivos que marcas agora, pero logo hai que ver como vai a competición e como van as xogadoras. Nomes non imos dicir, porque aínda non presentamos ás xogadoras, pero temos fichaxes pechados. O obxectivo é meterse nesas prazas e volver á categoría que perdemos.
– As Nosas: Cando comezaredes a pretempada?
Covi Regueiro: A primeria semana de agosto, aínda que a competición comeza o 4-5 de setembro. Temos moitas xogadoras de fóra, que están lonxe da familia, e a idea é que desfruten destes meses, dentro da normalidade. Que recarguen pilas e cando volvan o 1 ou 2 de agosto iniciar xa a pretempada.
Covi Regueiro: “Para nós agosto é un mes de adaptación e de integración das xogadoras”
Teremos tamén algún amigable, que o ano pasado non houbo. Para nós agosto é un mes de adaptación e de integración das xogadoras, de ver como está o grupo e a partir de aí si que xa iremos marcando obxectivos.
– As Nosas: Haberá moitas caras novas no plantel?
Covi Regueiro: Só ofrecimos a renovación a dúas xogadoras, as que considerabamos que si que podían aportar. O ano pasado o plantel non rendiu ao nivel que agardábamos. A idea é manter ás do filial e renovar plantel e vir con xente que teña outras ideas, outras ganas e obxectivos e teñan ganas de medrar e darse a coñecer. Que encaixen no proxecto do Friol.
