Ao longo da mañá deste martes, 27 de abril, o RC Deportivo celebrou de maneira telemática a Xunta Xeral Extraordinaria de Accionistas. Nesta reunión, aprobáronse os puntos relativos ao exercicio social da pasada campaña, o presuposto para a actual tempada, ratificouse a elección dos membros do Consello e actualizáronse os estatutos sociais, entre outros puntos.
Á súa fin, na que estivo representado o 78,65% das accións do club, o presidente, Antonio Couceiro, compareceu en rolda de prensa. Nela asegurou que ABANCA segue respaldando economicamente á entidade: “O máximo accionista aposta decididamente polo Deportivo a longo prazo”, declarou.
O Deportivo depende da categoría do seu equipo masculino
A saúde económica do club branquiazul depende en gran medida da categoría na que milite o seu primeiro equipo masculino. Actualmente, o Dépor loita por permanecer na Primeira PRO, a que sería a terceira categoría do fútbol español, por debaixo das dúas profesionais.
Nesta liña, Couceiro asegurou que é primordial a volta do equipo masculino á Segunda División. “Mentres non militemos no profesional, dificilmente teremos contas equilibradas”, explicou. O descenso de categoría diminuiu os ingresos do club, e segundo informou o presidente, “prodúcese un descadre de nove millóns de euros entre ingresos e gastos, que terán que ser financiados polo principal accionista”.
Antonio Couceiro: “Mentres non militemos no profesional, dificilmente teremos contas equilibradas”
Por este motivo, o dirixente recalcou que o esforzo económico realizado na tempada que está a chegar ao seu fin non se poderá volver a repetir. Para o próximo curso “haberá limitacións financeiras”, que condicionarán aos equipos do Deportivo.
En vista da influencia da división, Couceiro apuntou que “é evidente que hai que facer cambios, tratar de mellorar o plantel para conseguir ese obxectivo de forma inmediata”. Porén, prefire centrar a atención na presente tempada e posponer as decisións ata o remate dela. “Imos ter que tomar decisións importantes e complexas. Agora toca gañar, gañar e gañar”, engadiu.
O modelo de canteira
Na rolda de prensa tamén houbo tempo para poñer a vista na canteira, o futuro do Deportivo. Neste sentido, Couceiro indicou que “o modelo está claro”, apostando por unha canteira sostible en Abegondo. A intención desde a entidade coruñesa é “impulsar todo o relacionado coa incorporación de xoves talentos á canteira, baseada no territorio de Galicia, o noroeste e o norte de Portugal”.
Antonio Couceiro: “Imos tratar de impulsar todo o relacionado coa incorporación de xoves talentos á canteira, baseada no territorio de Galicia, o noroeste e o norte de Portugal”
Para logralo, o club porá todas as facilidades posibles para que as e os futbolistas cheguen a competir nos primeiros equipos, como o Dépor ABANCA. “Para iso fai falta tempo, traballo e inversión e necesitamos aos mellores profesionais para garantilo. Todos os nomes son imprescindibles para sacar adiante o proxecto de canteira, e contamos con todos”, afirmou o presidente.
O Consello traballa de maneira profesional e colexiada
Este Consello quere centrar a atención na área deportiva do club, que a actualidade estea marcada polas competicións deportivas, sendo as súas compoñentes as protagonistas, “desde o principio ata o fin”. Por iso, Couceiro busca que a comunicación “sexa máis profesional e estea centrada no ámbito deportivo”.
Antonio Couceiro: “Para esta tempada (a remuneración do Consello) non alcanzará nin o 20% e na próxima tampouco alcanzará o 100%”
No ámbito administrativo, este Consello recibirá unha remuneración en base á súa labor profesional, que estará limitada nunha cantidade total de 252.000 euros, o importe aprobado na Xunta. No relativo á esta cifra, o presidente asegurou que “para esta tempada non alcanzará nin o 20% e na próxima tampouco alcanzará o 100%”.
Noutra liña, o dirixente asegurou que o Consello traballa permanentemente e o fai de forma colexiada, consultando cada toma de decisións. Couceiro insistiu en que non existen “áreas funcionais” e a comunicación é fluída entre todos os membros.
