- O 2 de outubro regresa a maratón atlántica Coruña42 coa súa novena edición, un circuíto novo e un atractivo final na Praza de María Pita.
Despois da pandemia, o calendario atlético da cidade recupera a súa proba grande, a irmá maior da Coruña10 e a Coruña21, que reaparece cun enorme esforzo organizativo. O obxectivo do Goberno local é situala, novamente, entre as mellores de España e que sexa un patrimonio máis da Coruña.
A maratón poñerá a proba a resistencia dos/as deportistas con 42.195 metros polas rúas herculinas, onde, ademais, celebrarase, en paralelo, unha 10K.
O circuíto da Maratón Atlántica Coruña42, que partirá da Avenida de Montouto, presenta tres tramos diferenciados.
No primeiro, unha volta de 14.695 metros na que os/as atletas pasarán pola Mariña, os Cantóns, a Praza de Ourense, dirixiranse cara á Palloza, enfilarán a Avenida do Exército, pisarán rúas como Ramón e Cajal, Pérez Ardá ou Salvador de Madariaga, onde efectuarán un xiro de 180 graos, despois chegarán á zona portuaria e regresarán cara ao punto de saída.
Alí comezará o segundo tramo, que repite o primeiro e engade case 3 quilómetros por Salgado Torres, ata a rotonda de Lonzas. Nese punto virarase para tomar de novo dirección cara ao Porto e regresar á Avenida de Montouto.
A continuación, dez quilómetros finais cun percorrido pola zona de praias tras atravesar Juana de Veiga, San Andrés e Rúa Alta. Os/as deportistas correrán primeiro cara a Manuel Murguía e, posteriormente, en sentido á Torre de Hércules antes de afrontar os últimos metros por Sol, San Andrés e Rúa Nova, acceder á Rúa Real, Rega de Auga e, finalmente, a Praza de María Pita, onde estará a meta.
Recupérase así a chegada a María Pita desde Rega de Auga, que só se rexistrou, con moi boa aceptación por parte dos/as atletas, na edición de 2015.
Os circuítos da Coruña42 e a 10K paralela serán homologados pola Real Federación Española de Atletismo a finais de agosto ou principios de setembro.
A proba menor aproveita os dez quilómetros finais da maratón, pero os/as atletas de ambas as probas non coincidirán no asfalto.
Onde anotarse na Coruña42
O prazo de inscrición ordinario na web www.carreirasgalegas.com está aberto ata o domingo 18 de setembro ás 23:59 horas e o extraordinario, desde o luns 19 de setembro ao domingo 25 dese mes, unha semana antes da carreira, tamén ás 23:59 horas.
✍️ Aínda non vos anotastes na vindeira edición da XI Maratón Atlántica #Coruña42 e Carreira popular 10K?
Xa podedes inscribirvos en 👉 https://t.co/H7eILwP3Gj.
ℹ️ Máis información: https://t.co/cjPY2a5dqw pic.twitter.com/H4jZaWii1x
— A Coruña Deportes (@coruna_deportes) July 31, 2022
