O Concello da Coruña promove unha campaña de sendeirismo chamada ‘Veteranos activos‘ coa colaboración da Sociedade de Montaña Ártabros. A primeira xornada tiña previsto celebrarse hoxe, mércores 18 de xaneiro pero as malas condicións meteorolóxicas fixeron que a actividade se traslade ao 25 de xaneiro, segundo informaba a Sociedade de Montaña Ártabros. Esta primeira actividade transcorrerá polo concello de Cabana de Bergantiños.
Este programa ‘Veteranos activos‘ do Concello da Coruña está pensado para todo tipo de participantes, tanto aquelas persoas de maior idade como para persoas que queiran iniciarse no sendeirismo. As rutas estarán dirixidas por guías de Ártabros, que serán os responsables de marcar o ritmo e as paradas.
Haberá 45 prazas dispoñibles e o prezo será de 5 euros. As persoas interesadas poderán inscribirse a través do teléfono 981 21 31 15, no correo electrónico artabros@artabros.org ou de maneira presencial na sede da Sociedade de Montaña Ártabros (Rúa Santa Teresa, 14).
A saída será da explanada do Palacio dos Deportes de Riazor, facendo parada en Juan Flórez e Alfonso Molina. A ruta comezará na aldea de San Xoán de Briño e transcorrerá ata o Dolmen de Dombate e o Castro de Borneiro. Xa pola tarde, o grupo desplazarase ata Ponteceso e percorrerá o Paseo do Malecón, no estuario do río Anllóns.
O Concello da Coruña a través de iniciativas como ‘Veteranos activos‘ busca promover entre a cidadanía hábitos de vida saudable e a práctica diaria de actividades deportivas.
