Esta fin de semana o fútbol sala feminino coruñés está de festa en forma de derbi. Na cidade herculina as persoas aficionadas ao cinco contra cinco teñen a ocasión de vivir o primeiro partido en casa do Viaxes Amarelle FSF e, ao tempo, o primeiro duelo de rivalidade local en categoría nacional contra o 5 Coruña FS. A cita será o sábado 16 de outubro ás 18:00 h no Pavillón Municipal da Sagrada Familia da Coruña na segunda xornada do Grupo 1 da Segunda División do FutSalFem da RFEF
O conxunto laranxa do Viaxes Amarelle FSF, dirixido por adestrador Jorge Basanta, afronta esta fin de semana o seu primeiro partido como equipo anfitrión. Para maior goce do público, faino cun inédito derbi local coruñés en competición nacional.
Encadradas dentro do Grupo 1 da Segunda RFEF Futsal Feminino, o cadro galego do Viaxes Amarelle FSF afrontará a segunda xornada de liga no Pavillón Municipal de Sacra Familia (A Coruña) este sábado 16 de outubro de 2021, a partir das 18:00 horas, recibindo ao equipo veciño do 5 Coruña FS.
Así chegan Amarelle e 5 Coruña ao derbi
O Viaxes Amarelle FSF vén de imporse na primeira xornada, disputada o pasado fin de semana, por un axustado marcador de 1-2 fronte ao UDC Txantrea KKE; e afrontar unha semana de adestramentos, buscando seguir crecendo e aspirando a poder seguir puntuando.
Para este segundo partido que se disputará na tarde deste sábado, Jorge Basanta citou ás porteiras Sandra Rodríguez e Leti Rojo; así como ás xogadoras de pista, Candela, Patri Romaní, Cris Lourés, Èlia Gullí, Yaiza, Lau Doce, María Gómez e Carlita.
O rival que terá en fronte a escuadra laranxa é un 5 Coruña FS que conseguiu o ascenso desde a competición autonómica, e estréase en competición nacional mantendo o bloque de xogadoras da tempada pasada, así como a mesma adestradora, Fani Martínez.
O outro cadro herculino afronta unha tempada coa vista posta en conseguir a permanencia na categoría, pero as ganas e a ilusión do equipo poden sorprender a calquera rival, tras callar un bo partido o pasado fin de semana fronte ao Rodiles FSF, a pesar de que cederon unha derrota por un 0-3.
Precedente deste cruce na Copa Galicia
O último encontro que enfrontou ás dúas escuadras herculinas, remóntase a hai pouco máis dun mes, cando se enfrontaron en partido de fase previa da Copa Galicia Feminina FS. Nese partido as xogadoras que adestra o técnico Jorge Basanta impuxéronse ás que prepara Fani Martínez no marcador cun contundente 1-10. Pese ao precedente recente, o equipo laranxa non debe confiarse, e deberá de suar sobre a cancha, nun partido con carácter oficial e onde ambas as escuadras teñen moito en xogo.
O Viaxes Amarelle FSF tratará de mostrar a súa mellor versión, e poder sacar un bo resultado no seu primeiro encontro como conxunto local, e afrontar con enteireza un inédito derbi local nesta nova tempada 2021/2022. “Toca traballar sobre a pista, e poder aspirar a empezar a tempada en casa cun bo sabor de boca”, din desde o equipo laranxa.
Retransmisión en streaming do derbi da Coruña
Dando continuidade ao proxecto iniciado a tempada pasada de emisión dos partidos en streaming, o club continuará este curso coa mesma actuación, co fin de chegar a todo o público posible, seguir fomentando o fútbol sala feminino e que calquera poida seguir ao Viaxes Amarelle FSF na súa andaina pola Segunda RFEF Futsal Feminina.
A entidade herculina informa que xa ten todo listo para a emisión do encontro, o cal se poderá seguir na canle de YouTube do propio club, a través da seguinte ligazón: https://youtu.be/OSCWsUtWa5w.
