O Concello da Coruña, a través da Concellaría de Deportes, abriu onte luns 12 de setembro o prazo de inscrición para o Programa Municipal de Natación Escolar 2022-23, dirixida exclusivamente a escolares en terceiro e cuarto ano de primaria dos centros de ensino público da cidade.
O Programa Municipal de Natación Escolar, que este ano oferta un total de 500 prazas e implica a 27 CEIP situados no termo municipal da Coruña, ten como principal obxectivo fomentar hábitos saudables entre as e os máis pequenos, achegándoos ás disciplinas deportivas no medio acuático.
Neste sentido, as actividades de natación escolar, que comezarán o vindeiro luns 3 de outubro, levaranse a cabo entre a Piscina Municipal de Riazor (170 prazas), a Piscina Municipal do Club do Mar de San Amaro (265 prazas) e o Complexo Deportivo Municipal de San Diego (65 prazas).
A distribución do alumnado entre estas tres localizacións será a seguinte:
- Piscina Municipal de Riazor: CEIP’s Raquel Camacho; Prácticas; Emilia Pardo Bazán; Eusebio da Guarda; Labaca; San Pedro de Visma; María Barbeito y Cerviño; Concepción Arenal.
- Piscina Municipal do Club do Mar de San Amaro: CEIP’s Alborada; Wenceslao Fernández Flórez; Manuel Murguía; María Pita; San Francisco Javier; Torre de Hércules; Víctor López Seoane; Curros Enríquez; Cidade Vella; Sagrada Familia; José Cornide; Rosalía de Castro; Zalaeta; Novo Mesoiro.
- Complexo Deportivo Municipal de San Diego: CEIP’s Enrique Salgado Torres; Ramón de la Sagra; Juan Fernández Latorre; Anxo da Garda; Sal Lence.
Proceso de inscrición no Programa Municipal de Natación Escolar
O proceso de inscrición neste programa municipal de natación escolar para o curso 2022-23, que abriu onte, luns 12 de setembro o Concello da Coruña, rematará o vindeiro 23 de setembro. Nesta edición, o custo por alumno/a é de 53,47 euros, cota que inclúe o transporte de ida e volta desde o seu centro educativo, así como a pertinente cobertura sanitaria.
A solicitude e o pago poderanse realizar por orde de chegada, entregando a folla de inscrición nas seguintes localizacións:
- Os colexios que acudan á Piscina Municipal de Riazor: nas oficinas da Cidade Deportiva de Riazor. Será necesario solicitar cita previa, a través deste enlace.
- Os colexios que acudan á Piscina Municipal de San Amaro: Nas oficinas do Club do Mar de San Amaro.
- Os colexios que acudan á piscina de San Diego: Nas oficinas do Complexo Deportivo Municipal de San Diego.