O programa “Coruña en forma” converterá á cidade herculina nun grande escenario ao aire libre para practicar distintas disciplinas deportivas neste verán, segundo informa o Concello da Coruña.
A Concellaría de Deportes, pon en marcha un ano máis o programa Coruña en Forma para dinamizar durante os meses de verán espazos non convencionais para practicar o deporte e a actividade física: paseo marítimo, rúas, prazas, parques.
A proposta de actividades vai encamiñada a fomentar a práctica do exercicio físico entre toda a cidadanía coruñesa, pero especialmente para a poboación máis sedentaria, como pode ser a terceira idade.
As actividades serán na Coruña de xullo a setembro
A Coruña converterase así nos meses de xullo a setembro, os meses de inactividade nas tradicionais Escolas Deportivas Municipais, nunha grande instalación deportiva ao aire libre.
Haberá actividade física nas praias de Riazor e Oza, no parque Europa, no parque de Vioño, no miradoiro da praia de Matadoiro, no Barrio das Flores, e tamén nos xardíns da Mestranza e na praza dos Avós.
