O Raid Gallaecia-AR World Championship 2021 toca ao seu fin tras sete días de aventura, esforzo e superación.
Foi toda unha semana de competición intensa e pouco descanso que arrincaba coa saída en terras lucenses, en Monforte de Lemos, e chegaba ao Parrote na Coruña logo de pasar por medio cento de concellos galegos. Alí, acarón do mar, despediu esta edición o Campionato do Mundo de carreiras de aventura cunha festa e homenaxe para os deportistas participantes e, nomeadamente, aos finishers.
Ao fío do mediodía do sábado 9 de outubro, o cuarteto da Peña Guara-Sherpa atravesou a liña de meta ubicada no Parrote coruñés cun tempo total de 6 días, 23 horas e 47 minutos, a só 13 do peche de control. O aragonés foi o último dos 45 cuartetos que cruzaron a meta cubrindo a totalidade dos 630 quilómetros do percorrido dentro do tempo establecido pola organización, aínda que subiu un posto debido á penalización que sufriu o Restaurante Puerto Guardés-Vizhoja-Cornelios.
Pola tarde foi a quenda para a cerimonia de clausura, cun vídeo resumen da carreira, un emocionante recordo para a raider campioa do mundo Emma Roca, falecida leste mesmo ano, e para a entrega de premios, cunha distinción para o cinco primeiros clasificados:
- Swedish Armed Forces Adventure Team sueco.
- Estonian ACE Adventure-A Sportiva estoniano.
- NIAR Adventure Racing Team sueco (3º).
- Torpedo Vidaraid español.
- Black Hill checo.
Mónica Martínez, concelleira de Deportes do Concello da Coruña; José Tomei, presidente da Deputación de Lugo; Cristina Capelán, deputada de Deportes da Deputación da Coruña; Ana Cherchi, brand manager de Aguas Estrela Galicia, e Antonio Cortés, director RSC de Gadisa, foron os encargados de entregar os galardóns.
Pablo López sobre o Raid Gallaecia: “Todo empezou cun grupo de amigos”
O director de carreira deste raid de aventura, Pablo López Franco, agradeceu o apoio e o compromiso de todos os patrocinadores e colaboradores que fixeron posible a celebración deste Raid Gallaecia-AR World Championship 2021. O coruñés lembrou o camiño percorrido desde os inicios da proba en 2005 até o día de hoxe, a culminación do proxecto.
“Todo empezou cun grupo de amigos, corredores de aventura. Fomos a primeira carreira galega que entrou na liga Española e, catro edicións despois de ingresar nas Series Mundiais, para nós é unha honra acabar este proxecto acollendo o Campionato do Mundo de carreiras de aventura”, resumiu.
Pablo López, director da carreira: “Todo empezou cun grupo de amigos, corredores de aventura. Fomos a primeira carreira galega que entrou na liga Española e, catro edicións despois de ingresar nas Series Mundiais, para nós é unha honra acabar este proxecto acollendo o Campionato do Mundo de carreiras de aventura”
López Franco lembrou a dificultade engadida que supón organizar un evento internacional coas restricións polo covid: “Está claro que en tempos de pandemia é moi difícil organizar unha carreira deste tipo, pero teño que agradecer a toda a comunidade de aventura a resposta que tiveron”.
Pablo López, director da carreira: “En tempos de pandemia é moi difícil organizar unha carreira deste tipo, pero teño que agradecer a toda a comunidade de aventura a resposta que tiveron”
Un total de 90 equipos e 358 deportistas participaron no Raid Gallaecia – AR World Championship 2021, para os que o director de carreira tivo unha mensaxe: “O percorrido non foi elixido por casualidade. Levamos reservando estas áreas ao longo de moitos anos para este evento. E esperamos que as gozastes”.
Pablo López, director da carreira: “O percorrido non foi elixido por casualidade. Levamos reservando estas áreas ao longo de moitos anos para este evento. E esperamos que as gozastes”
Cinco equipos galegos completaron a totalidade da carreira máis dura do mundo
