A alcaldesa da Coruña, Inés Rey, asistiu á apertura da pista de patinaxe de Novo Mesoiro, unha nova instalación deportiva executada polo Concello herculino. Esta pista conta coas medidas precisas para ser apta de cara á celebración de probas e competicións deportivas oficiais.
Os traballos contaron cun orzamento de 191.419 euros. A nova pista de patinaxe sitúase moi próxima ao polideportivo municipal de Novo Mesoiro e ao campo de fútbol da Fundación Johan Cruyff. Conta con 2.600 metros cadrados de superficie, que incrementarán e mellorarán as dotacións deportivas do barrio, que conta coa media de idade máis baixa entre os dez distritos que compoñen a cidade.
A pista de Novo Mesoiro, que ten unha lonxitude de corda interior de 125 metros e unha rúa de cinco metros de ancho, é un recinto ao aire libre que se suma aos equipamentos e servizos xa existentes no barrio para dar servizo aos residentes. “Esta será a primeira pista de patinaxe na Coruña con esas dimensións e contribuirá a dinamizar o barrio atraendo a afeccionados de outros puntos da cidade”, apuntou Inés Rey.
📸 ÁLBUM | Así é, en imaxes, a nova pista de patinaxe do barrio de Novo Mesoiro.
▪️ 2.600 metros cadrados de superficie.
▪️ Lonxitude de corda interior de 125 metros. pic.twitter.com/mqm29eG8A2— Concello da Coruña (@ConcelloCoruna) December 16, 2022
A pista responde ao compromiso da alcaldesa coa posta en marcha de novas instalacións deportivas, así como coa mellora das xa existentes. Hai unha semana, a rexedora presidiu a apertura do novo rocódromo municipal de Riazor, unha instalación á vangarda en Galicia nesta disciplina. “O rocódromo e esta nova pista de patinaxe amplían as instalacións municipais para deportes non maioritarios como a patinaxe e a escalada. Amosamos así o noso compromiso co tecido deportivo da cidade e cos seus barrios”, sinalou Inés Rey.
Inés Rey, alcaldesa da Coruña: “O rocódromo e esta nova pista amplían as instalacións municipais para deportes non maioritarios. Amosamos así o noso compromiso co tecido deportivo da cidade e cos seus barrios”
Exhibición de patinaxe na pista de Novo Mesoiro
A alcaldesa do Concello da Coruña estivo acompañada por Mónica Martínez, concelleira de Deportes, , e representantes da asociación de veciños de Novo Mesoiro, que asistiron a unha exhibición de patinaxe.
Este sábado 17 de decembro haberá outra exhibición de velocidade, ás 11.00 horas, cos clubs coruñeses Alquimia e Galicia Rollers.
