O Concello da Coruña avanza co plan de reforzo dos equipamentos públicos no parque Adolfo Suárez, onde está previsto habilitar un novo espazo lúdico e deportivo que ampliará a oferta de ocio e lecer existente nesta área verde.
Os traballos, adxudicados a semana pasada á empresa Citanias, suporán un investimento de máis de 340.000 euros, que permitirá dar un pulo importante ao parque con respecto á superficie de xogo dispoñible actualmente, que inclúe unha pequena área infantil e un biosaudable con materiais xa obsoletos, e que esixe unha reforma integral.
Neste sentido, o Concello da Coruña aproveitará a explanada do parque para executar unha nova pista multideporte (semellante á habilitada hai un ano no núcleo poboacional da Silva), renovará por completo a área infantil, con novos equipamentos, e tamén adaptará o espazo biosaudable para dar resposta ás necesidades das persoas usuarias.
A alcaldesa da Coruña, Inés Rey, fixo fincapé na importancia desta intervención, plantexada co obxectivo de adecuar os espazos do parque Adolfo Suárez á demanda existente na contorna, con diversos centros educativos situados moi preto da área verde.
A rexedora lembrou que un dos compromisos que asumiu o Goberno municipal neste mandato foi que, con vistas ao ano 2030, todas as familias da Coruña, vivan onde vivan, conten cun parque infantil a dez minutos ou menos da súa vivenda. “Iso implica renovar e modernizar as áreas de xogos xa existentes, así como crear outras novas en distritos ou barrios que carecen delas. E esa será a liña de traballo que seguiremos”, dixo Inés Rey.
