Dous barcos de vela na praza de María Pita non se ven todos os días, pero hoxe era unha data especial na que ese espazo foi escenario da presentación do Maeloc Campionato de España da clase J70. Esta competición de embarcacións a vela vaise realizará en augas coruñesas desde o venres até o domingo organizado por Mariña Coruña e o Real Club Náutico. A cita será selectiva para poder participar no Campionato de Europa e no Campionato de Mundo.
No acto de presentación deste campionato estatal de J70 estiveron presentes o tenente de alcaldesa do Concello da Coruña, Juan Ignacio Borrego, a concelleira de Deportes, Mónica Martínez, o regatista e presidente do comité organizador, Chuny Bermúdez de Castro, o presidente da Autoridade Portuaria, Martín Fernández Pardo e persoas representantes das entidades organizadoras e patrocinadoras do evento como Ana Rosado de Maeloc, Guillermo Blanco polo Náutico, Ramón Ojea en nome da Clase J70 España.
A organización anunciaba hoxe inscricións destacadas como a do barco finés Revalence que patronea Henrik Thelen, que conta na súa tripulación con Magnus Borg, Joanas Dromberg e Jan Osterman, que pertenecen al Brändo Seglare de Helsinki.
Entre os barcos lusos, tamén se confirma a participación do Sail Cascais que compite polo Club Naval de Cascais. A embarcación ten por patrón ao lexendario caña lisboeta Vasco Serpa e coma táctica á muller número un da vela portuguesa: Mafalda Pires de Lima do Club de Vela Atlántico de Leixóe. compretan a tripulación o olímpico Diogo Pinto, Guilherme Gomes e Joana Azevedo.
Xustamente ao pé do consistorio herculino ubicáronse dous dos mellores barcos que estarán competindo este campionato estatal. En concreto o Bosch Service Solutions que patroneará o actual campión de España de clase Finn, o coruñés Miguel Fernández Vasco, e que contará con varios tripulantes do Viva México… y La Guardia & Moreira do lucense afincado en Vigo, Gonzalo Araújo, un dos mellores regatistas galegos á caña nas últimas décadas.
Martínez: “A Coruña será referente da vela de alta competición esta fin de semana”
A concelleira de Deportes manifestou a intención do Goberno de Inés Rey de que A Coruña se converta nun referente para o deporte náutico e animou a veciñanza a gozar dunha cita que reúne na cidade a gran parte das mellores tripulacións da vela pesada española, xa que a proba conta con representantes de Galicia, Asturias, Cantabria, País Vasco, Cataluña, Valencia, Murcia, Baleares, Canarias e Madrid; e tamén navegantes de Portugal, México e Arxentina.
“A Coruña será pois referente da vela de alta competición esta fin de semana. A vela en particular, e os deportes náuticos en xeral, son para o Goberno da nosa alcaldesa, Inés Rey, un investimento de cidade, un compromiso para que a veciñanza da Coruña, e especialmente a xente máis nova, viva de cara ao noso pavillón azul, aquel que nos brinda un océano de oportunidades que están ao alcance da nosa man e da nosa mirada. Temos o deber de volver a cara ao mar, como cidade mariñeira que somos”, dixo Martínez.
A concelleira de Deportes, Mónica Martínez, salientaba que “Os deportes náuticos son para o Goberno local da Coruña un investimento de cidade”
E lembrou que nos meses de xullo, agosto e setembro a Concellería de Deportes porá en marcha por vez primeira o programa Coruña no mar. Serán cursos de iniciación e perfeccionamento de distintas actividades náuticas para que a cidadanía sexa protagonista activa no coñecemento e respecto ao mar.
O tenente de alcaldesa, Juan Ignacio Borrego, deulles a benvida á cidade a todas as persoas participantes e destacou que o evento deportivo “é unha oportunidade para que a Coruña se converta nun referente na práctica dos deportes náuticos”.
Pola súa banda, o regatista e presidente do comité organizador, Chuny Bermúdez de Castro, expresou a súa satisfacción de que sexa a súa cidade a anfitrioa do campionato e animou a todas as coruñesas e coruñeses a gozar dunha regata que “é a mellor maneira de promocionar a nosa costa, o sector náutico, é unha cidade que se vende por si sola”.
⛵ Ao fío das tres da tarde deste venres dará comezo na baía da Coruña o Maeloc Campionato de España da Clase J70, organizado por Marina Coruña e o @RCNCORUNA, co apoio da Clase J70 España e o @ConcelloCoruna
#maelocj70españa pic.twitter.com/02DgkEiaXZ— A Coruña Deportes (@coruna_deportes) May 13, 2021
