O Concello da Coruña abre hoxe, martes 2 de maio, o prazo para a renovación das matrículas nas Escolas Deportivas Municipais (EDM) para o curso 2023-2024.
As solicitudes poderán presentarse nos rexistros da Cidade Deportiva de Riazor, da Cidade Deportiva da Torre Arsenio Iglesias ou no Polideportivo Municipal do Barrio das Flores, en horario de atención ao público, de luns a venres de 8.15 a 14.00 horas ata o 14 de xuño e ata ás 13.30 horas do 15 en adiante. As renovacións para actividades desenvoltas en San Diego e San Amaro realizaranse nestes centros no seu propio horario de atención.
A renovación da matrícula das Escolas Deportivas Municipais vai dirixida a todo o alumnado matriculado e asistente nas EDM no curso 2022-23 que desexe manter a súa participación nas actividades o vindeiro curso 2023-2024, tanto no caso das actividades xestionadas directamente polo Servizo Municipal de Deportes (SMD) do Concello da Coruña, como das organizadas polas concesionarias do Complexo Deportivo de San Diego e do Club do Mar de San Amaro.
📢 Lembra que hoxe abriu o prazo para a renovación de matrículas nas #EscolasDeportivasMunicipais de cara ao curso 2023-2024.
Toda a información sobre a documentación a presentar, así como a do proceso de solicitude, aquí: https://t.co/gYopX5SHL5 pic.twitter.com/h0eA0ihNNu
— Concello da Coruña (@ConcelloCoruna) May 2, 2023
A renovación da matrícula nas Escolas Deportivas Municipais realizarase na actividade, no grupo e horario no que se estea inscrito/a no curso 2022-23. O SMD poderá cambiar a denominación dos grupos co fin de ordenar a oferta das EDM. Neste caso, cada persoa quedará adscrita a un grupo equivalente ao que estaba matriculada.
No caso de que se deba realizar un cambio de grupo por idade ou nos casos de AGÁS, a coordinación das Escolas Deportivas Municipais asignaralle praza a esas persoas noutro grupo sempre e cando iso sexa posible polo número de prazas dispoñibles.
O calendario para as solicitudes será o seguinte: as renovacións xerais serán do 2 ao 9 de xuño e as renovacións con cambio de grupo por idade serán do 19 ao 23 de xuño. Os cambios de horario serán do 15 ao 21 xuño a través de rexistro e, se fose necesario, habería un sorteo o 27 de xuño.
As persoas que, rematado o prazo de renovación que corresponda, non fixeran o pagamento da taxa correspondente entenderase que renuncian á praza na que podían renovar. A dita praza pasará á convocatoria libre e ofertarase no mes de setembro de 2023.
Toda a información sobre o proceso publicarase na páxina web da Concellaría de Deportes e nos taboleiros de anuncios das instalacións deportivas municipais. A cidadanía tamén se pode informar a través do servizo de atención á cidadanía do 010.
