A AD Cortegada está case de celebración. A falta de tres xornadas, son practicamente equipo de Liga Feminina 2. Na súa visita ao País Vasco as galegas caeron ante o Barakaldo, pero venceron ao Azkoitia Azpeitia, sumando dous puntos que practicamente certifican a súa permanencia.
As galegas desprazábanse uns 600 quilómetros para xogar dous partidos en menos de 24 horas, aproveitando a viaxe para disputar a 23 e 24 xornada.
Derrota ante o Barakaldo
Non comezaba ben a fin de semana para as de Vilagarcía. A AD Cortegada visitaba a un Barakaldo asentado na zona media na que xa ocupan a sexta praza.
As vascas dominaron o control do partido case desde o seu comezo. Co paso dos minutos as locais afastábanse cada vez máis dun conxunto galego castigado polas baixas rotacións. Nogueira tivo que facer malabares para repartir ás súas, polo que por momentos Cris Loureiro tivo que xogar de catro e Sedlakova e Wanyama repartíndose no posto de cinco.
Pola súa parte, o Barakaldo abusaba do poderío do seu xogo exterior coas súas pívots, anulando a defensa galega. En ataque Sara Gómez e Patricia Vicente non tiñan opcións de achegarse ao aro. Nos minutos finais, cando o marcador xa informaba do 20-7, Zeltia Presas e Cris Loureiro minimizaron o desastre galego con seis puntos que maquillaban o resultado.
Para o segundo cuarto, o Cortegada seguía a ser ineficaz baixo o aro, á vez que as súas rivais non fallaban, ampliando a súa renda aos 17 puntos, a máxima do encontro. Para o descando, o electrónico estaba no 35-20.
Tras a pausa as galegas saíron renovadas e asestaron un parcial 0-9 que foi unha declaración de intencións. As de Nogueira estaban listas para loitar polo partido. Durante a primeira metade do terceiro cuarto descolocou ás vascas, que non reaccionaron ata un tripo de Romero a unha canastra de Uchendu, xa á fin deste tempo.
O último cuarto chegaba co AD Cortegada aínda por debaixo, pero disposto a morir matando. Patricia Vicente colocouse ao mando do seu equipo para poñelo a cinco puntos das locais con case catro minutos aínda para finalizar.
Pero as galegas non foron capaces de realizar o empullón final, e foron a menos, á vez que un alarmado Barakaldo aseguraba a vitoria da man de Uchendu. A remontada non foi posible e o duelo rematou no 61-52.
Dous puntos para o Cortegada que fan soñar coa permanencia
Maior sorte correron as galegas ao día seguinte. A falta de descanso entre un partido e outro non foi nin escusa nin condicionante para unha gran actuación das de Vilagarcía ante o Azkoitia Azpeitia, un candidato á fase de ascenso.
Pero o inicio do partido non facía prever o resultado final. Ambos equipos saltaron con enerxía á pista, necesitados dos dous puntos para os seus obxectivos. Os primeiros puntos foron para as vascas, pero un parcial 0-8, obra de Loureiro e Vicente, situaba por diante ás galegas.
Cunha defensa férrea, capaz de frear ata a Morgan Green, unha das mellores xogadoras da competición, o Cortegada mantíñase dentro do partido. Coa estadounidense bloqueada, o Azpeitia tiña problemas na creación de ataques.
Aproveitando os erros rivais, o Cortegada mantíñase por riba, cunha vantaxe de nove puntos. Pero no segundo cuarto as locais comezaron a reaccionar da man de Sara Iparraguirre, cunha defensa zonal que permitiu un 5-0 e recortar distancias. Nogueira viuse obrigado entón a solicitar un tempo morto para manter ás galegas á cabeza. Coa terceira persoal de Sedlakova, Wanyama entrou na pista, resultando eventualmente unha xogadora clave.
Tras o descanso, co marcador no 23-28, o Cortegada mostrouse decidido a levarse a vitoria que estaba a conseguir. Cun parcial 0-6 as visitantes chegaron a ter unha vantaxe de dez puntos, en parte grazas ao bloqueo de Morgan nas filas locais.
Os ataques das visitantes, materializados en Patricia Vicente, dábanlles as de gañar, pero sempre pola mínima polo que podía pasar calquera cousa. En cousa dun par de minutos, á fin do terceiro cuarto, Iparraguirre fixo un 2+2+1, que deixaba ao seu equipo cun 42-45. Un triplo de Vicente poñía o 42-48 con todo o último tempo por xogar.
As locais saíron fortes e confiadas a este último cuarto, asestando un contundente 11-0 no primeiro parcial que non foi capaz de tumbar ao Cortegada. Tres tiros libres de Vicente foron suficientes para que as galegas mantiveran a vantaxe, que rematou ampliada no 61-72 final.
O Cortegada é (case) equipo de LF2
Tras esta intensa fin de semana, a AD Cortegada suma 30 puntos e ocupa a novena posición da táboa. Empatadas a puntos están as décimas e undécimas, e con dous menos as duodécimas, décimo tercieras e as colistas, o Ulla Oil Rosalía.
Con este colchón de posicións, as de Vilagarcía teñen practicamente a salvación garantida. Só teñen tres partidos por disputar: o adiado co Celta Zorka Recalvi (segundo), a 25ª xornada co Magec Tías (duodécimas) e a 26ª contra a ADBA (penúltimas).
