Con 15 puntos tras tres vitorias e nove derrotas chegan tanto a AD Cortegada como a Agrupación Deportiva Baloncesto Avilés á décimo terceira xornada da Liga Feminina 2 que as enfrenta. Ambos conxuntos xogarán na pista do Avilés, o sábado, 19 de decembro, ás 19:00 horas.
As galegas veñen de dúas semanas seguidas con dous partidos en cada fin de semana, un desgaste do que non poderán acusar neste duelo ante un rival directo.
O Cortegada chegaba ao partido contra o colista, o Magec Tías “Contra la Violencia de Género”, necesitado dunha vitoria que frease a racha de malos resultados. O cambio no banco de Vilagarcía, coa entrada de Javier Nogueira como adestrador, parece que beneficiou ás amarelas e lograron reencontrarse coa vitoria.
Ao día seguinte recuperaron o partido contra o Osés Construcción Ardoi cunha derrota final de 60-68. Ardoi foi un rival superior, que ocupa actualmente a segunda praza, pero ao que o cadro de Nogueira soubo tutear e obrigarlle a loitar ata o último balón.
Pola súa parte, a ADBA ven de perder ante outro galego, o Arxil, que tamén chegaba á anterior xornada cunha serie de cinco derrotas consecutivas. E as asturianas sumaron outra derrota esta semana, ao recuperar o partido adiado da xornada 3 ante o Azkoitia Azpeitia.
A AD Cortegada xa confirmou que pasou os tests con resultados negativos e desprazarase a Avilés para disputar o encontro que peche a primeira volta competitiva.
